Քաղաքագետ Գագիկ Համբարյանը, պատասխանելով Aravot.am-ի այն հարցին, թե իր կարծիքով Վահան Մարտիրոսյանին Հայաստանում հովանավորե՞լ են, որ նա տեղափոխվի Ադրբեջան, ասաց, որ չի ուզում հավատալ նման վարկածի:
Հիշեցնենք, որ վերջինիս նկատմամբ քրեական գործ էր հարուցված ու որպես խափանման միջոց ընտրված էր ստորագրություն քաղաքից չբացակայելու մասին:
«Ես չեմ ուզում հավատալ, որ նրան հովանավորել են, որ մեկնի, նրանք այդ դեպքում Ադրբեջանի գործակալներ են, Հայաստանի Հանրապետությանը դավաճանողներ: Ի դեպ, ԵԽԽՎ-ում Ադրբեջանի պատվիրակության ղեկավար Սամեդ Սեիդովն ադրբեջանական կայքերից մեկին տված հարցազրույցում, այս մասին ասել է, որ սա առաջին ու վերջին դեպքը չի լինի, տասնյակներով մարդիկ կան, որոնք ցանկություն ունեն Հայաստանից տեղափոխվել Ադրբեջան: Սա մեր ազգային անվտանգության ու ուժային կառույցների համար մտահոգվելու շատ մեծ թեմա պետք է դառնա: Սա ուղերձ է մեր ԱԱԾ-ի պետին, Հայաստանի Հանրապետության իշխանություններին:
Ես չեմ ասում, որ մեր ուժային կառույցները թույլ են աշխատում, նրանք գաղտնի են աշխատում ու ոչ ոք նրանց գործունեության վերաբերյալ տեղեկություն չի կարող ունենալ, բայց որ Վահան Մարտիրոսյան օպերացիան իրականացվեց, նրանք քնած մնացին»:
Կարդացեք նաև
Մանրամասները՝ վաղվա «Առավոտ» օրաթերթում:
Նունե ԱՐԵՎՇԱՏՅԱՆ
