Ինչպե՞ս հաջողվեց ձեզ ԲՀԿ-ին այդքան կտրուկ ոչ-ից հետո բերել այո-ի քարոզարշավին: Այսօր ԱԺ ճեպազրույցների ժամանակ ՀՀԿ խմբակցության ղեկավար Վահրամ Բաղդասարյանը այս հարցին պատասխանեց, որ ԲՀԿ-ն, Նաիրա Զոհրաբյանը գնում էին այդ հարցով կոնսուլտացիաներին: Ինձ համար զարմանալի չէ, որ ԲՀԿ-ն կողմ է: Վահրամ Բաղդասարյանը չի հասկացել, թե ԲՀԿ-ն այն ժամանակ ինչին էր դեմ եւ ինչին էր ոչ ասում. «Աշխատանք պետք չի տանել: Մենք բոլորի հետ ենք աշխատում, որովհետեւ պետք է կարողանանք մատուցել մարդկանց, որ ճիշտ ըմբռնեն այն իրավիճակը, որը կա: Եթե հիշում եք, 5-6 ամիս առաջ լրիվ այլ պատկեր էր: Հայտարարում էին քաղաքական ուժերը, որ չեն մասնակցում, բայց իրենք կարդացին ու հասկացան, թե ինչ է առաջարկվում եւ հասկացան, որ մենք անում ենք ընդդիմադիրների գործը, իրենց երազանքը: Այն մարդիկ, որոնք ոչ են ասում, անձնավորված են ասում, դա քաղաքական չէ: Իրենք ոչ են ասում, որովհետեւ մենք այո ենք ասում»:
Հարցին՝ ՀՀԿ-ն պատրաս՞տ է հանրաքվեն անցկացնել առանց կեղծիքների՝ Սուրիկ Խաչատրյանի, Մհեր Սեդրակյանի հետ՝ Վահրամ Բաղդասարյանը պատասխանեց. «Մայր օրենքի ընտրությունը եթե որեւէ այլ ճանապարհով անցնի, դա շատ վտանգավոր է մեր երկրի հետագա զարգացման համար: Մենք պետք է կարողանանք այդ ընտրությունները կազմակերպել ամենաբարձր մակարդակով»:
Ըստ Վահրամ Բաղդասարյանի, եթե մինչ օրս ընտրություններում եղել են բացասական երեւույթներ, դրանցով զբաղվել են իրավապահ մարմինները:
Հռիփսիմե ՋԵԲԵՋՅԱՆ
