«Գաֆեսճյան» արվեստի կենտրոնում՝ «Գրական տապան» միջազգային փառատոնի շրջանակում այսօր ընթերցողներին ներկայացվեց ամերիկահայ գրող, վիպասան Քրիս Բոհջալյանի «Ավազե ամրոցի աղջիկները» վեպը: 2012 թվականին լույս տեսած գիրքը դարձել է ԱՄՆ-ում ամենաշատ վաճառվող գրքերից: Այն սիրո եւ մահվան պատմություն է՝ ջարդի եւ գաղթի ճանապարհին: Բոհջալյանի խոսքով՝ գիրքը ներկայացնում է, թե ինչպես առանց որեւէ մեկի իմանալու՝ սպանվեց 1,5 միլիոն հայ:
«Հերոսս պատմում է իր տատի եւ պապի պատմությունը: Նրանք հանդիպում եւ սիրահարվում են 1915-ին: Քանի որ գրել եմ նաեւ ամերիկացի ընթերցողների համար, հերոսուհու տատը գրքում ներկայացվում է որպես ամերիկուհի: Նրա սիրեցյալը՝ Պետրոսյանը, կռվող հայի կերպար է: Ես ատում եմ հայերի՝ առանց կռվի զոհվելու մասին պատմությունները, ժամանակն է մտածել Վանի հերոսամարտի եւ Մուսալեռան պաշտպանության մասին»,-ասաց Քրիս Բոհջալյանը: Նա անկեղծացավ՝ ասելով. «Չէի սպասում, որ վեպը կընթերցվի ԱՄՆ-ից դուրս՝ ամբողջ աշխարհում: Մինչդեռ 2010 թվականին, երբ սկսեցի գրել վեպը, ԱՄՆ-ում շատերը չգիտեին Հայոց ցեղասպանության մասին»:
Բոհջալյանը պատմեց, որ իր հայրական եւ մայրական կողմի ծնողներն ապրել են ցեղասպանությունը, սակայն այդ մասին ժառանգները շատ քիչ բան են իմացել: Գրքում ներառված են նաեւ հայկական ավերված եկեղեցիների եւ գերեզմանների լուսանկարներ, որոնք հեղինակն արել է Արեւմտյան Հայաստանում:
Նշենք, որ Բոհջալյանի գրքերը թարգմանվել են 30 լեզուներով եւ հրատարակվել 20 երկրում: Վեպերից 7-ը գլխավորել են «Նյու Յորք Թայմս»-ի ամենաշատ վաճառված գրքերի ցանկը:
Կարդացեք նաև
DCIM105MEDIA
Ընթերցողներին ներկայացվեց նաեւ ռումինահայ գրող, քաղաքական գործիչ Վարուժան Ոսկանյանի՝ Ցեղասպանության մասին պատմող «Շշուկների մատյան» գիրքը: Ինչպես ավելի վաղ տեղեկացրել էինք, գրքի թուրքերեն թարգմանության հրատարակությունը կիսատ է մնացել, քանի որ հրատարակիչը փախել է Թուրքիայից՝ հետապնդումներից խուսափելու համար:
Լուիզա ՍՈՒՔԻԱՍՅԱՆ
