Ռուս ոստիկանները բացահայտել են Մոսկվայի նավթամուղներից մեկից գողություն կատարած անձին: Այս մասին «Росбалт»-ին տեղեկացրել են Ռուսաստանի ներքին գործերի նախարարությունից:
Նշված է, որ ՌԴ ներքին գործերի նախարարություն ահազանգ է ստացվել, որ Մոսկվայում գտնվող նավթամուղներից մեկից դիզելային վառելիք է գողացվել: Դեպքի վայր ժամանած ոստիկանները ձերբակալել են Հայաստանի Հանրապետության 48-ամյա մի քաղաքացու, որը կասկածվում է դիզվառելիքը գողանալու մեջ:
«Պարզվել է, որ տղամարդն իր ամառանոցի տարածքից ծակել է նավթամուղը եւ գողացել մոտավորապես 1 տոննա դիզելային վառելիք: Նյութական վնասը կազմել է 35 հազար ռուբլի: Քրեական գործ է հարուցվել ՌԴ քրեական օրենսգրքի 158-րդ հոդվածով (գողություն նավթամուղից, գազատարից): Այս հոդվածով նախատեսվում է 6 տարվա ազատազրկում»,- հաղորդել են ՌԴ ՆԳՆ մամուլի ծառայությունից:
Պատրաստեց Աշոտ ԻՍՐԱԵԼՅԱՆԸ
