Խորվաթիայի Պորեչ քաղաքում ընթացող շախմատի 8-ից 18 տարեկան պատանիների Եվրոպայի 25-րդ առաջնությունում, որին մասնակցում է 41 երկիր, Հայաստանը տղաների եւ աղջիկների մրցաշարերում ներկայացված է 23 հոգով:
Խաղացված երկու տուրերից հետո առավել հաջող են ընթանում մեր տղաների գործերը: Չորս պատանիներ տարել են երկուական հաղթանակ, իսկ նրանցից երկուսը գլխավորում են մրցաշարային աղյուսակները:
Մինչեւ 18 տարեկանների խմբում միջազգային վարպետ Մանվել Պետրոսյանը երեկ պարտության մատնեց նաեւ Վրաստանի ներկայացուցիչ Նոե Տուտիսանիին եւ լրացուցիչ գործակիցներով ընթանում է առաջին հորիզոնականում: Մինչեւ 8 տարեկանների մրցապայքարում Ռոբերտ Փիլիպոսյանը հաղթեց հունգարացի Մաթիաս Պալչերտին ու նույնպես գլխավորեց պայքարը: Երկուական հաղթանակ են տարել նաեւ 12 տարեկանների մրցաշարի մասնակիցներ Մամիկոն Ղարիբյանը եւ Գոռ Մելքոնյանը եւ ընթանում են միավոր չկորցրած առաջատար շախմատիստների խմբում:
Կարդացեք նաև
Աղջիկների առաջնությունում առայժմ ամենից լավ արդյունք ունեն Մանե Ադամյանը (14 տարեկաններ) եւ Նադեժդա Խաչատրյանը (12 տարեկաններ), որոնք իրենց անվան առջեւ գրանցել են 1,5-ական միավոր:
«Առավոտ» օրաթերթ
23.09..2015
