«Թրանսփերենսի ինթերնեյշնլ» հակակոռուպցիոն կենտրոն հ/կ-ի գործադիր տնօրեն Վարուժան Հոկտանյանը լուրջ չի վերաբերում այսօր ձեւավորված քաղհասարակություն-հակակոռուպցիոն աշխատանքային հարթակին:
Aravot.am-ը Վարուժան Հոկտանյանից հետաքրքրվեց՝ կոռուպցիայի դեմ պայքարող հ/կ-ի ղեկավարն ինչո՞ւ է դեմ այդ հարթակին:
«Ես պետք է տեսնեմ, որ երկրում իրապես իրականացվում է լուրջ հակակոռուպցիոն քաղաքականություն: Կառավարությունը, իշխանությունը իսկապես պրոակտիվ են, ներգրավում են քաղհասարակությանը որոշումների ընդունման գործընթացում: Նմանատիպ մի խումբ էլ ձեւավորվեց 2004-ին՝ մոնիտորինգային հանձնաժողովը, այն նույնպես հարթակ էր, կար կոռուպցիայի դեմ պայքարող առանձին խորհուրդ, միայն պետական մարմինների ներկայացուցիչներով եւ կար մոնիտորինգի հանձնաժողով, այն ժամանակ ոգեւորությամբ մտանք հանձնաժողով, բայց 2007-ի փետրվարին դուրս եկանք, որովհետեւ այդ հանձնաժողովը որեւէ լուրջ փոփոխություններ չարեց: Այդ մոնիտորինգային հանձնաժողովը աշխատում էր, բայց որեւէ արդյունք չկար, ավելին՝ վերջին տարին նույնիսկ նիստեր չէին անցկացնում: 2003 թվականից կոռուպցիայի վիճակով Հայաստանում լճացման վիճակ է, չկա առաջընթաց, միայն լճացման վիճակ է: Հիմնական խնդիրը դա էր, որ չեմ ցանկանում միանալ հարթակին, որովհետեւ չէի ուզենա նախկին՝ այդ տխուր փորձը նորից կրկնվեր»,-պարզաբանեց պարոն Հոկտանյանը:
Անդրադառնալով քաղհասարակություն-հակակոռուպցիոն աշխատանքային հարթակի ներկայացրած ռազմավարությանը՝ պարոն Հոկտանյանն ասաց, որ այն կոռուպցիայի դեմ պայքարում շատ սահմանափակ լուծումներ է առաջարկում, եւ այն ոլորտները, որոնք ֆիքսված են ռազամավարության մեջ, հնարավոր է այդ ոլորտներում վարչական, այսպես ասած, ցածր մակարդակի կոռուպցիան վերացվի, եթե իշխանական կամք լինի, այլ ոչ թե գեղեցիկ փաստաթուղթ:
Կարդացեք նաև
Արփինե ՍԻՄՈՆՅԱՆ
