ԵԱՀԿ խորհրդարանական վեհաժողովի նախագահ Իլկա Կաներվան որոշել է, որ ԵԱՀԿ ԽՎ-ի պատվիրակությունը չի մասնակցի նոյեմբերի 1-ին Ադրբեջանում կայանալիք խորհրդարանական ընտրություններին: Այս մասին տեղեկանում ենք ԵԱՀԿ ԽՎ-ի պաշտոնական կայքից:
Իլկա Կաներվան սեպտեմբերի 17-ին՝ վեհաժողովի աշնանային նստաշրջանի ընթացքում, ասել է, թե այս որոշումը կայացրել է, որովհետեւ Ադրբեջանի իշխանությունների կողմից սահմանված սահմանափակումների պատճառով ԵԱՀԿ Ժողովրդավարական հաստատությունների և մարդու իրավունքների գրասենյակը (ԺՀՄԻԳ) նույնպես դիտորդներ չի ուղարկում:
«Ադրբեջանի կառավարությունը սահմանափակումներ է մտցրել մեր ԵԱՀԿ ավանդական գործընկերոջ՝ ԺՀՄԻԳ-ի աշխատանքներում: Որպես արդյունք՝ ԺՀՄԻԳ-ը ստիպված է չեղյալ հայտարարել իրենց ծրագրած այցելությունն Ադրբեջան: Ես կարծում եմ, որ շատ տեղին է, որ մեր շատ կարեւոր ու մոտ գործընկեր ԺՀՄԻԳ-ի դիտարկումը կատարել չկարողանալու պայմաններում՝ մենք էլ չդիտարկենք Ադրբեջանի ընտրությունները»,- մասնավորապես ասել է ԵԱՀԿ ԽՎ նախագահը:
Վեհաժողովի որոշումն այսօր հաստատվել ԵԱՀԿ ԽՎ գլխավոր քարտուղար Սպենսեր Օլիվերի կողմից. «Որպես ԵԱՀԿ-ին անդամակցող երկիր, Ադրբեջանը ստորագրել է Կոպենհագենի 1990 թվականի փաստաթուղթը, որով ԵԱՀԿ դիտորդներին հրավիրում է իր ընտրություններին: Ուստի ցավալի է, որ իշխանությունները համառությամբ սահմանափակում են դիտորդների թիվը, ինչը կարող է վնասել ընտրությունների դիտարկման արդյունավետությանը եւ վստահելիությանը: Վեհաժողովի նախագահը հայտարարել է, որ մենք կմերժենք Ադրբեջան դիտորդներ ուղարկելը, եթե ԺՀՄԻԳ-ը չուղարկի»,- ասել է Օլիվերը:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
