Ռուբեն Հակոբյանը, ԱԺ-ում խոսելով 1995-ի կեղծիքով պարտադրված Սահմանադրության մասին, ասաց, որ նրանք, ովքեր այն ժամանակ դա արեցին, հիմա սեւերի ու սպիտակների են բաժանում ամեն ինչ: Նա դիմեց ընդդիմությանը, ասաց. «Այս իշխանություններին պետք է ամեն օր ծափահարեք, դուք, որ այդ ավանդությամբ ընդունեցիք Սահմանադրությունը: Լավագույնս ձեր հորդորները կատարում են: Ասում էիք՝ պետք է կեղծելով վերարտադրվենք, մարդիկ անում են՝ ի՞նչ եք ուզում: Դուք մի հատ դարակազմիկ եզրույթ ունեիք, որ պոլի փետ լինի՝ ՀՀՇ լինի: Այս մարդիկ կատարելության են հասցրել դա: Սա ենթադրում է, որ ինչքան հանցագործ, ժուլիկ լինի՝ խցկվի իշխանություն: Հիմա անում են, ի՞նչ եք ուզում: Դուք լավագույն դաշնակիցն եք այսօրվա իշխանությունների»: Նա վստահեցրեց, որ այս 25 տարվա ընթացքում իշխանությունների արժեքային համակարգը երբեք չի փոխվել:
Այս առնչությամբ Aravot.am-ի հետ զրույցում ՀՀԿ խմբակցության ղեկավար Վահրամ Բաղդասարյանը մեր հարցին՝ համաձա՞յն եք այդ համեմատության հետ, որ դուք շարունակում եք ՀՀՇ-ի «ավանդույթները» եւ հետեւում եք նրանց հորդորներին՝ պատասխանեց. «Դա ընդունեք որպես Ռուբիկ Հակոբյանի անձնական կարծիք: Չեմ կիսում նրա կարծիքը: Ես չէ, որ պետք է գնահատեմ նախկին եւ ներկայիս իշխանությունների արժեքային համակարգը: Փոփոխությունները բավականին են եւ տեսանելի»:
Մեր հարցին՝ Դուք չե՞ք առաջնորդվում այն կարգախոսով, որ «ՀՀԿ լինի՝ պոլի փետ լինի»՝ Վահրամ Բաղդասարյանը պատասխանեց. «Դուք ինքներդ եք տեսնում, որ ընդհանրապես նման բան գոյություն չունի: Հաճախ իրենք էլ են քննադատում, որ ոչ կուսակցականներն են պաշտոնները ստանում, ասում էին՝ իբր թե ՀՀԿ-ն չունի իր բազան, դրա համար էլ ոչ ՀՀԿ-ականների են պաշտոնների նշանակում: Եթե նկատեք, անկուսակցական են բավականին շատ ներքին կառույցների ղեկավարները, մարդիկ, որոնք ընդհանրապես ՀՀԿ-ի կազմում չեն: Այդպիսի մարդիկ այսօր զբաղեցնում են բավականին պաշտոններ»:
Վահրամ Բաղդասարյանը հիշեցրեց, որ ՀՀԿ-ի խմբակցությունն էլ բազմակուսակցական է. «Շուրջ 7 կուսակցություններից բաղկացած խմբակցություն է»:
Կարդացեք նաև
Մեր հարցին՝ դպրոցների, մանկապարտեզների տնօրենների հանրապետականացումը, որի հետ կապված բավականին քննադատություններ եղան, դա չի՞ խոսում հակառակի մասին՝ Վահրամ Բաղդասարյանը պատասխանեց. «Ես հիմա չեմ կարող մեկ-մեկ օրինակներ բերել, թե որ տոկոսն է ՀՀԿ-ական, որ տոկոսը՝ այլ կուսակցական: Համենայնդեպս, դրանք զուտ անձնական կարծիքներ են եւ պատճառաբանություններ: Երբ հաջողությունների չեն հասնում քաղաքական ուժերը, բնականաբար, իրենց անհաջողությունները արդարացնելու համար ինչ-որ պատրվակներ պետք է առաջ բերեն: Դրանք պատրվակներ են»:
Հռիփսիմե ՋԵԲԵՋՅԱՆ
Դրանք պատրվակներ չեն…
Ուղղակի հհկ-ն աշխատանքից ու հացից զրկում է բոլոր նրանց, ովքեր իրենց չեն քծնում ու շողոքորթում, ովքեր ընդունակ չեն անասնական ու ախոռային բարքերին տրվելու…և ենթարկվելու…
Մնացել են նրանք,ովքեր ընդունակ են ապականության…