Հայաստանի Անկախության 24-րդ տարեդարձի առթիվ շուրջ երկու տասնյակ երիտասարդներ երդման արարողությամբ մուտք գործեցին Սոցիալ Դեմոկրատ Հնչակյան կուսակցության շարքերը: Եռաբլուր պանթեոնում՝ Հնչակյան կուսակցության «Մեծն Մուրադ» ջոկատի նահատակ Սերգեյ Քոչարյանի՝ Որսորդի շիրիմին կուսակցական դարձած նորագիրները երդվեցին կյանքի գնով հավատարիմ լինել Հայրենիքին, Ժողովրդին և Հնչակյան կուսակցությանը:
ՍԴՀԿ Կենտրոնական վարչության ատենապետ ընկ. Հակոբ Տիգրանյանն իր ելույթում նշեց, որ «Հնչակյան կուսակցությունը տասնյակ հազարավոր զոհեր է տվել Հանուն Հայրենիքի Անկախության և Ազատության»:
«Մեր ընկերները հաստատ գիտեին, հանուն ինչի՞ են զոհաբերում իրենց կյանքը: Դարձեք արժանին մեր հերոսների»,-իր խոսքում նշեց ընկ. Տիգրանյանը:
Կարդացեք նաև
ՍԴՀԿ Հայաստանի վարչության ատենապետ ընկ. Նարեկ Գալստյանը, անդրադառնալով օրվա խորհրդին, նշեց, որ 1887 թ-ին, երբ ստեղծվեց ՍԴՀԿ, առաջին իսկ օրից իր ծրագրում հստակորեն նշեց Անկախ Հայաստան ունենալու խորհուրդը:
ՍԴՀԿ ԿՎ անդամ ընկ. Եղիա Ջերեջյանն իր խոսքում նշեց, որ Հնչակյան ֆիդայիները, ովքեր կռվում էին Սասունում, Զեյթունում, Ադանայում, Հաճնում և Հայկական բարձրավանդակի բոլոր հատվածներում, իրենց երազներում ունեին Անկախ Հայաստան կերտելու ծրագիրը:
Նորագիրները համալրեցին ՍԴՀԿ «Սարգիս Տխրունի» ուսանողական-երիտասարդական միության շարքերը:
ՍԴՀԿ Մամլո դիւան
