«Եթե մի բանը չի ստացվում, նույն բանն անընդհատ փորձելու իմաստը ո՞րն է»,- ԱԺ պատգամավոր Էդմոն Մարուքյանն այսպիսի գնահատական տվեց հրապարակի, փողոցային հանրահավաքների տարբերակով իշխանափոխության համար պայքարող ընդդիմադիրներին:
Մեր դիտարկմանը, որ ընդդիմությունն ասում է՝ բա ի՞նչ անենք, հո ձեռքներս ծալած չե՞նք նստի՝ Էդմոն Մարուքյանը պատասխանեց. «Դա իրենց խնդիրն է: Ես ցույց կտամ, թե ինչ է պետք անել: Ամեն մարդ իր լուծումներն ունի»:
Թե ի՞նչ մեթոդների է դիմելու պատգամավորը՝ Էդմոն Մարուքյանը պատասխանեց. «Հիմա ես չեմ պատրաստվում իմ քաղաքական օրակարգը բացահայտեմ, որովհետեւ դրա համար կա հստակ օր, ժամ եւ այլն: Այսինքն, այն նախաձեռնությունը, որը շուտով պետք է սկսվի, կլինի ծրագիրը, կլինեն հիմնական գաղափարախոսությունները, մեթոդները, հռետորաբանությունը, այդ ամեն ինչը շուտով կտեսնեք»:
Մեր հարցին՝ արդեն հաշվի՞ եք առել անցյալի սխալները՝ հրապարակի միջոցով իշխանությունը փոխելու փորձերը՝ Էդմոն Մարուքյանը պատասխանեց. «Միանշանակ: Ես երբ որ առաջադրվում էի մեծամասնական ընտրակարգով, էլի անցյալի փորձերը հաշվի էի առել, դրա համար էլ հաղթեցի»:
Կարդացեք նաև
Մեր դիտարկմանը, որ այսպես ինտրիգային նախաձեռնություն եք սկսում՝ նա պատասխանեց. «Ում համար ինտրիգային, ում համար՝ սպասվող, ում համար՝ փոփոխություններ բերող: Ես կարծում եմ՝ փոփոխություններ բերող նախաձեռնություն է: Չեմ բացառում, որ նաեւ ինտրիգներ կլինեն»:
Հռիփսիմե ՋԵԲԵՋՅԱՆ
