Այսօր Անկախության տոնին Եռաբլուր էր եկել ՀՀ ոստիկանապետ Վլադիմիր Գասպարյանը: Նա բոլորին շնորհավորեց տոնի առթիվ՝ ասելով, որ դա այն գերագույն արժեքն է, որը ձեռք ենք բերել:
Լրագրողները հետաքրքրվեցին, թե Բաղրամյանում ցույցը ինչո՞ւ նոր մեթոդով ցրեցին, ոչ թե բռնությամբ, ջրցանով, այլ պարով: Վլադիմիր Գասպարյանը ծիծաղելով պատասխանեց. «Դե լողանալուց հետո մի քիչ էլ պետք է պարել: Նորմալ ա, դրանից էլ եք դժգոհ հա՞»: Ոստիկանապետը լրագրողներին կոչ արեց այսօր խաղաղվել ու դուրս գալ քաղաքականությունից, քանի որ տոն է:
Հարցին՝ այնուամենայնիվ, ինչո՞ւ նոր մեթոդի դիմեցիք հավաքը ցրելու համար, հետեւություննե՞ր արեցիք նախկինում հնչած քննադատություններից՝ ոստիկանապետը պատասխանեց. «Մենք բոլոր առողջ քննադատություններից հետեւություններ ենք անում, իսկ անառողջ քննադատություններին՝ սովորեցնում ենք»:
Թե ինչպես է ոստիկանությունը պատրաստվում ցրել «Ոչ»-ի ճակատի հրավիրած ցույցերը՝ Վլադիմիր Գասպարյանն ասաց. «Կլինի օրենքի սահմաններում՝ կգնա խաղաղ, թե չի լինի օրենքի սահմաններում՝ կպարենք»:
Կարդացեք նաև
Հռիփսիմե ՋԵԲԵՋՅԱՆ
