Շվեյցարիայի, Գերմանիայի և Հայաստանի միջև մեկնարկում է արվեստագետների փոխանակման միջազգային նոր ծրագիր, որի շրջանակներում նկարիչներին հնարավորություն է ընձեռվում վեց ամիս ապրել և ստեղծագործել Բազել, Ֆրայբուրգ և Երևան քաղաքներում:
Այս մասին սեպտեմբերի 19-ին լրագրողների հետ հանդիպման ժամանակ ասաց «Մշակույթների երկխոսություն» հիմնադրամի նախագահ Սոնա Հարությունյանը:
Ծրագիրը կմեկնարկի 2016 թվականի հունվարին: Երևանից Ֆրայբուրգ քաղաքի հյուրն է լինելու նկարիչ Արման Վահանյանը:
Իսկ «Մշակույթների երկխոսություն» հիմնադրամը 2016-ի հուլիսին Երևանում կհյուրընկալի շվեյցարացի նկարիչ Սիլաս Հայմանին:
Կարդացեք նաև
Նկարիչների՝ վեց ամսում ստեղծած աշխատանքները կներկայացվեն անհատական ցուցահանդեսներում:
«Ծրագրի նպատակն է զարգացնել Բազել, Ֆրայբուրգ և Երևան քաղաքների միջմշակութային կապերն ու նպաստավոր պայմաններ ստեղծել արվեստագետների փոխադարձ շփումների համար»,- ասաց Սոնա Հարությունյանը:
Նրա խոսքով՝ այսպիսի ծրագրերը երիտասարդ ստեղծագործողներին թույլ են տալիս նաև իրենց ստեղծագործությանը մի փոքր այլ դիտանկյունից նայելու: «Բացի այդ, ծրագիրը հնարավորություն է տալիս հայ արվեստասերներին ծանոթանալու մեր երկրում հյուրընկալված արվեստագետի գործերին: Օտարներն էլ մեր արվեստագետի աշխատանքներին են ծանոթանում, Հայաստանն ավելի ճանաչելի է դառնում աշխարհին»,- հավելեց «Մշակույթների երկխոսություն» հիմնադրամի նախագահը՝ հույս հայտնելով, որ արվեստագետների փոխանակման միջազգային նոր ծրագիրը շարունակական կլինի:
Սիրանուշ ՀԱՅՐԱՊԵՏՅԱՆ
