Միջազգային և անվտանգության հարցերի հայկական ինստիտուտում այսօր «Հայաստանի ինքնիշխանության մարտահրավերները ՀՀ անկախության 25-րդ տարում» թեմայով կազմակերպված քննարկման ժամանակ «Քաղաքական եւ միջազգային հետազոտությունների հայկական կենտրոն»-ի փորձագետ Ռուբեն Մեհրաբյանն անդրադարձավ ՀՀ արտգործնախարար Էդվարդ Նալբանդյանի՝ վերջերս BBC բրիտանական հեռուստաալիքին տված հարցազրույցին: Փորձագետի կարծիքով՝ նախարարի որոշ հայտարարություններ պարզապես անընդունելի են. «Նա փաստորեն հայտարարում է՝ նորմալ է, որ Ռուսաստանը զենք է վաճառում Ադրբեջանին, դա գուցե մեր դաշնակցի բիզնեսն է: Փաստորեն, նշանակում է, որ սահմանին հայ զինվորների զոհվելը մեր դաշնակցի բիզնեսն է՞…եթե դա է ասվածի իմաստը, ես հրաժարվում եմ նախարարի այդ հայտարարությունը հասկանալուց»:
Ռուբեն Մեհրաբյանի խոսքով՝ ՀՀ վարչապետը ԵՏՄ շրջանակներում հանդիպման ժամանակ հզոր հակակրանք է հայտնում ԱՄՆ դոլարի, եւ անսահման սեր՝ ռուսական ռուբլու նկատմամբ. «Նախագահն էլ ռուսական կողմին առաջարկում է խաղաղապահներ պատրաստել Հայաստանում: Սա կատաստրոֆիկ առաջարկություն է, ռուս խաղաղապահ՝ նշանակում է տեռորիստական ռեժիմ Հայաստանում: Ռուս խաղաղապահ՝ նշանակում է՝ տապակած սառույց»,-ասաց բանախոսը:
Նա կարծում է, որ Հայաստանում ռուսական օկուպացիոն ռեժիմ է ձեւավորել. «Ռուսական կայսրության դիակը, որի թույնը լցվում է մեր երկիր, թաղել է պետք, եւ դա կարող է անել առաջադեմ երիտասարդությունը»:
Կարդացեք նաև
Լուիզա ՍՈՒՔԻԱՍՅԱՆ
