«Հայաստանի ինքնիշխանության դեմ ուղղված քարոզչությունը 90-ականներին եւ մի փոքր ավելի ուշ քողարկված էր, իսկ հիմա սպառնալիք է եւ ցինիկ բնույթ է կրում»,-այսօր Միջազգային և անվտանգության հարցերի հայկական ինստիտուտում «Հայաստանի ինքնիշխանության մարտահրավերները ՀՀ անկախության 25-րդ տարում» թեմայով կազմակերպված քննարկման ժամանակ ասաց Մամուլի ազգային ակումբի ղեկավար Նարինե Մկրտչյանը: Նա ամփոփ վերլուծությամբ ներկայացրեց Հայաստանի ինքնիշխանության առավել ակնառու մարտահրավերները՝ առանձնացնելով ԶԼՄ-ների միջոցով իրականացվող ռուսամետ քարոզչությունը: Նարինե Մկրտչյանը նշեց, որ հեռուստաընկերությունների մեծ մասը քարոզում է իշխանությունների գաղափարախոսությունը, այն է՝ Ռուսաստանի կազմի մեջ մտնելու անհրաժեշտությունը:
«Հասարակության զգալի հատված, հիմնականում մեծահասակները, որոնք համացանցի հետ չեն առնչվում, տեղեկատվությունը ստանում են հայկական եւ ռուսական հեռուստաալիքներից: Վերջիններս նաեւ Կովկասյան քաղաքականության ռուսամետ քարոզչություն են իրականացնում՝ աղավաղելով իրականությունը: Իհարկե Հայաստանում կան այլընտրանքային՝ ազատ լրատվամիջոցներ, բայց հասարակական կարծիքը դեռ ձեւավորվում է հեռուստատեսության միջոցով: Քարոզվում է, որ ենք կարող առանց Ռուսաստանի, անվտանգության խնդիր ունենք: Սակայն իրականում Հայաստանի ինքնիշխանության դեմ է քարոզ իրականացվում»,-ասա Նարինե Մկրտչյանը:
«Ի՞նչ է անում Հայաստանում Ռուսաստանի դեսպանը. ուղղակի ղեկավարում է այդ քարոզչությունը իշխանությանն ուղղված ցուցումներով: Սա կասեցնելը շատ բարդ է: Այլ բան է, որ հասարակությունը պետք է ինքնակազմավորվի եւ հասկանա՝ ուր է գնում: Ուսանողներս բառացի կրկնում են այն, ինչն ասում են մեծերը՝ անկախ նրանից՝ հարցը քաղաքական է, թե ոչ: Այսպես «քարոզչական ահաբեկչությունը» խեղում է նոր սերունդը»,-նշեց բանախոսը:
Կարդացեք նաև
Լուիզա ՍՈՒՔԻԱՍՅԱՆ
