Սեյրան Օհանյանի խոսքերով՝ ՊՆ-ն բյուջեի կատարման համար ոչ մի խնդիր չունի
Կառավարությունում սեպտեմբերի 18-ին ավարտվել է Հայաստանի Հանրապետության 2016 թվականի պետբյուջեի նախնական տարբերակի քննարկում:
Պաշտպանության նախարար Սեյրան Օհանյանը լրագրողների հետ զրույցում, անդրադառնալով պետբյուջեի նախնական տարբերակի քննարկմանն, ասաց, որ կառավարության հետ համատեղ պաշտպանության նախարարության հետ կատարած աշխատանքը թույլ է տալիս ասել, որ ՊՆ-ն բյուջեի կատարման համար ոչ մի խնդիր չունի, 2015 թվականին պաշտպանության նախարարությանը հատկացվող բոլոր միջոցները տեղին են օգտագործվում. «2016 թվականի համար քննարկումներ են ընթանում: Մեր իրականության մեջ պաշտպանության նախարարին այնքան մեծ ջանքեր պետք չեն, որպեսզի ինքն ապացուցի բյուջեի շարունակական կատարելագործման, ավելացման անհրաժեշտությունը, որովհետեւ մեր պետության ղեկավարությունը՝ անձամբ նախագահը, մեր կառավարությունը դա հասկանում են, եւ իրենք են ներկայացնում այն ուղղությունները, որոնցով մենք պետք է առաջնորդվենք եւ ավելացնենք մեր հնարավորությունները: Իհարկե՛, քննարկումների ընթացքում մենք անցկացնում ենք տարբեր տիպի աշխատանքներ, հիմնավորումներ, որոնք որ հիմք են հանդիսանում վերջնական որոշում ընդունելու համար: Այժմ մենք քննարկման փուլում ենք, քննարկման փուլի արդյունքները թույլ են տալիս ասել, որ մենք մտավախություն պետք չէ ունենանք 2016 թվականի զինված ուժերի զարգացման համար»:
Ամի ՉԻՉԱԿՅԱՆ
