Այսօր ԱԺ-ում, երբ ամբիոնին մոտեցավ «Ժառանգություն» խմբակցության պատգամավոր Թեւան Պողոսյանը՝ Սահմանադրական փոփոխությունների նախագծի մասին ելույթ ունենալու, ԱԺ փոխխոսնակ Էդուարդ Շարմազանովը հեգնեց նրան՝ հատուկ ներկայացնելով՝ «Ժառանգություն» խմբակցության քարտուղար, ղեկավար դեռ ոնց որ չեք ընտրել, չէ՞: Թեւան Պողոսյանը ժպտաց ու պատասխանեց, որ ելույթ է ունենում՝ որպես անհատ պատգամավոր եւ իր անձնական կարծիքն է ներկայացնում:
Նա շնորհակալություն հայտնեց հիմնական զեկուցող Վարդան Պողոսյանին եւ ասաց, որ հավատում է նրան: Թեւան Պողոսյանը նշեց, որ չի կարող հստակ ասել՝ փոփոխություններին կողմ է, թե դեմ, որովհետեւ որոշ դրույթների կողմ է, որոշ դրույթների՝ ոչ:
«Ժառանգությունը» հայտարարել է, որ խմբակցության ղեկավար կնշանակվի Զարուհի Փոստանջյանը: Նա իր ելույթում հայտարարեց, որ բոլոր այն ուժերը, որոնք ցանկանում են Սերժ Սարգսյանից օր առաջ ազատվել, մերժում են նրան, պետք է համախմբվեն համահայկական օրակարգի ներքո. «Լինի ՀՀ-ում, թե Արցախում, թե այլ տարածքում, համահայկական օրակարգի ներքո մենք պետք է ընդունենք նվազագույն Սահմանադրական օրենքներ, որոնցից առնվազն պետք է ընդունվի նոր Ընտրական օրենսգիրք, որը կապահովի ընտրական իրավունքի լիարժեք իրացում: Պետք է ընդունվի նաեւ «Լյուստրացիայի մասին» օրենք եւ պետք է ապօրինի սեփականաշնորհված գույքը հետ վերադարձվի պետությանը»:
Հետո Զարուհի Փոստանջյանն ասաց, որ պետք է անցումային արդարադատություն իրականացնեն. «Առաջինը պետք է այդ արդարադատությամբ անցնեն Սերժ Սարգսյանը եւ Ռոբերտ Քոչարյանը: Հետո, ես համոզված եմ, այլ անուններ էլ կլինեն, ովքեր պետք է անցնեն այդ արդարադատությամբ»:
Կարդացեք նաև
Հաջորդ քայլը, ըստ տիկին Փոստանջյանի, պետք է ժամանակավոր կառավարության ստեղծումը լինի, որը պետք է պաշտոնավարի մոտ 6 ամիս, որից հետո պետք է անցկացվեն արտահերթ խորհրդարանական եւ նախագահական ընտրություններ, իսկ այն, ինչ տեղի է ունենում այս խորհրդարանի պատերի ներքո, ըստ պատգամավորի, բեմադրություն է, որը կարող են դիտել, բայց այդ բեմադրությանը չեն մասնակցի:
Նա կոչ արեց քաղաքացիներին. «Մեր տեղը այսուհետեւ լինելու է ՀՀ-ի բոլոր քաղաքներն ու փողոցները: Համախմբման միջոցով մենք պարալիզացնելու ենք այս ապօրինի իշխանության գործունեությունը եւ Սերժ Սարգսյանի ծավալած գործունեությունը: Մինչեւ հանրաքվեի օրը մենք պետք է ազատվենք Սերժ Սարգսյանից: Հանրաքվեի օրը մենք պետք է հիմնադրենք նոր ժամանակավոր կառավարություն, որը պետք է լուծում տա իմ բարձրացրած հարցերին»:
Հռիփսիմե ՋԵԲԵՋՅԱՆ
