Արդեն հայտնի է, թե որքան կնստի կառավարության վրա էլեկտրաէներգիայի սակագնի սուբսիդավորումը։ Հոսանքի թանկացումից հետո սպառողների երկու խմբերին տրամադրվող փոխհատուցման դիմաց գործադիրը կվճարի ավելի քան 1 մլրդ դրամ։ Խոսքը բնակչության եւ փոքր ու միջին բիզնեսի կողմից օգոստոսին օգտագործված էլեկտրաէներգիայի համար տրամադրվող սուբսիդավորման մասին է։
Ինչպես հայտնի է, օգոստոսից Հայաստանում գործողության մեջ են մտել էլեկտրաէներգիայի նոր սակագները։ Ըստ այդմ, արդեն սեպտեմբերին սպառողները վճարում են նոր պայմաններով։ Բաշխիչ էլեկտրացանցեր ընկերությունը հավաստիացնում է, որ համակարգը պատրաստ է դրան.
-Հէցը սեպտեմբերի 12-ից փոստային եւ բանկային ծառայություններին է ուղարկել էլեկտրաէներգիայի նախորդ ամսվա վճարումները օգոստոսի 1-ից ուժի մեջ մտած էլեկտրաէներգիայի սակագների հիման վրա։
Բնակիչ-բաժանորդներն իրենց անդորրագրերի վրա հնարավորություն կունենան տեսնել ծախսած էլեկտրաէներգիայի արժեքը նոր սակագնով, ինչպես նաեւ հաշվիչի ցուցմունքները։ Առանձին նշված կլինեն ինչպես բաժանորդի կողմից վճարման ենթակա գումարը, այնպես էլ Հայաստանի կառավարության կողմից սուբսիդավորվող գումարը։
Ներդրվել է նոր ծրագիր, որը պետք է հնարավորություն տա տարանջատելու օգտագործված հոսանքի ծախսը. «Մենք ուրբաթ օրը օգոստոս ամսվա վճարումներն ուղարկել ենք բանկերին եւ փոստերին, որտեղ մեր կողմից ծրագրային փաթեթ է ներդրված»։
Թեեւ բաշխիչ ցանցերից հավաստիացնում են, որ բաժանորդներն արդեն կարող են վճարել օգոստոսին օգտագործված էլեկտրաէներգիայի դիմաց, այնուհանդերձ այդ առումով որոշակի խնդիրներ են ի հայտ եկել։ Մասնավորապես առանձին փոստային բաժանմունքներ դեռեւս պատրաստ չեն օգտվելու ներդրված նոր ծրագրային փաթեթի հնարավորություններից, ինչն անհարմարություններ է ստեղծում բաժանորդների համար։
https://www.armworld.am/detail.php?paperid=5151&pageid=157596&lang=
Հ. ՍԱՀԱԿՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
