ՀՀ արդարադատության նորանշանակ նախարար Արփինե Հովհաննիսյանին այսօր «շնորհավորում եմ, տիկին Հովհաննիսյան» արտահայտությամբ էին մոտենում ոլորտում հայտնի մասնագետները:
ԱՊՀ ՄԽՎ ԺԶՄՄԻ երևանյան մասնաճյուղի կողմից կազմակերպված «Սահմանադրական բարեփոխումների հայեցակարգի դրույթները և դրանց իրացման հիմնական ուղղությունները Հայաստանի Հանրապետությունում» թեմայով կլոր սեղան-քննարկմանը փոքր-ինչ ուշացումով մասնակցեց նաև Արփինե Հովհաննիսյանը:
Ընդմիջմանը նրան հերթով մոտենում ու շնորհավորում էին ոլորտում հայտնի մասնագետները, Արփինե Հովհաննիսյանի ներկայացմամբ՝ իր նախկին դասախոսները, իր ներկայիս ամբիոնի վարիչը:
Aravot.am-ը ցանկացավ որոշ հարցեր հղել նորանշանակ նախարարին: Արփինե Հովհաննիսյանը խուսափեց պատասխանել մեր՝ իրավական ոլորտին վերաբերող հարցադրումներին՝ պատճառաբանելով, թե դեռ ուսումնասիրում է ոլորտը, և իրեն փոքր-ինչ ժամանակ է անհրաժեշտ այդ դաշտում գոյություն ունեցող խնդիրներին ավելի մոտիկից ծանոթանալու համար:
Կարդացեք նաև
Aravot.am-ը հետաքրքրվեց՝ այդ դեպքում ինչու՞ է միանգամից կադրային ջարդ սկսել նախարարությունում, Արփինե Հովհաննիսյանը պատասխանեց. «Որպես այդպիսին կադրային ջարդ չի լինելու, որևէ նախնական որոշում, նախնական տրամադրվածություն և պլան այս հարցի կապակցությամբ չունեմ: Աշխատանքի ընթացքը ցույց կտա, և այդ հարցում կարևորելու եմ յուրաքանչյուր աշխատակցի պրոֆեսիոնալիզմն ու աշխատանքի նվիրվածությունը»:
Տաթև ՀԱՐՈՒԹՅՈՒՆՅԱՆ
