Ինչպես արդեն տեղեկացրել ենք, այսօր ՀՀ նախագահի նստավայրի դիմացից խաղաղ պայմաններում զոհված զինծառայողների մայրերը ուղևորվել են դեպի հիվանդանոց: Խնդիրն այն է, որ Վալերի Մուրադյանի մայրը՝ Նանա Մուրադյանը, մայիսի 13-ին նախագահական նստավայրի դարպասի մոտից ոստիկանների կողմից բռնության ենթարկվելուց հետո կրծքի հատվածում ցավեր ունի, որոնք ավելի են սրանում:
Ուստի որոշել է` բացի Հոկտեմբերյանում ստուգվելուց, հետազոտություն անցնել նաև Երևանում: Ժամեր անց տիկին Մուրադյանը մեզ փոխանցեց, որ հետազոտությունները ցույց են տալիս, որ իր առողջական վիճակը սրվել է, ինչը իր փոխանցմամբ՝ հնարավոր է կապված լինի նախագահականի առաջ տեղի ունեցածի հետ:
Հետաքրքրվեցինք՝ այսօր ՀՀ նախագահի նստավայրի դիմաց հավաքվելու իմաստը ո՞րն էր, նա ասաց. «Նպատակն այն է, որ մեր ներկայությունը ցույց տանք: Ու երբ ոստիկանները մեզ տեսան, միանգամից խառնվեցին իրար, սկսեցին ավելանալ: Սակայն ես և Իրինա Ղազարյանը մի քանի րոպե կանգնեցինք ու շտապեցինք հիվանդանոց»:
Տիկին Մուրադյանը տեղեկացրեց, որ իրենք նորություններ են սպասում ԱԺ-ից, քանի որ Զարուհի Փոստանջյանը խոստացել է, որ ԱԺ-ում իրենց տղաների գործերը քննելու համար հանձնաժողով ստեղծելու հետ կապված հարցը կբարձրացնի:
Կարդացեք նաև
Տաթև ՀԱՐՈՒԹՅՈՒՆՅԱՆ
