Գյումրիում տեղակայված 102-րդ ռազմաբազայում քիչ առաջ ավարտվեց Ավետիսյանների ընտանիքի սպանության մեջ մեղադրվող Վալերի Պերմյակովի դատահոգեբանական և դատահոգեբուժական փորձաքննությունը, որը տևեց մոտ 3-4 ժամ և որն անցկացնելու միջնորդություն ներկայացրել էին Ավետիսյանների փաստաբանները:
Հայտնի փաստաբան Լուսինե Սահակյանը մեզ հետ զրույցում ասաց, որ այդ փորձաքննության ընթացքում բավական նորություններ պարզվեցին իրենց համար, հնարավոր է և որոշակի միջնորդություններ ներկայացնելու առիթ դառնան: Փորձաքննության ընթացքի մասին փաստաբանները նշեցին, որ չեն կարող ասել ոչինչ:
Տուժողների շահերը ներկայացնող Երեմ Սարգսյանը ևս փաստեց, որ իրենց համար էական ու շատ կարևոր հանգամանքներ պարզվեցին, ըստ նրա, Պերմյակովի վարքագիծը շատ հետաքրքիր էր փորձագետների հետ շփման ընթացքում: Փաստաբանը կարևորեց այս ամենը սեփական աչքով տեսնելը, սակայն ասաց, որ այս մասին տվյալներ չեն կարող հրապարակել: Հետագայում հնարավոր է հանդես կան նոր միջնորդություններով կամ բոլոր տվյալներն օգտագործեն առկա ապացույցները գնահատելու տեսանկյունից:
Թե ե՞րբ պատրաստ կլինի այս փորձաքննության եզրակացությունը, փաստաբանն ասաց, որ դա կախված է փորձագետներից:
Կարդացեք նաև
Հարցին, թե միջնորդություն կներկայացնեն Պերմյակովին դեպքի վայր՝ Ավետիսյանների տուն տանելու, Երեմ Սարգսյանն ասաց, որ այս պահին նպատակահարմար չեն գտնում. կարևոր է այն, որ Պերմյակովը առանց դեպքի վայրը տեսնելու նկարագրի կատարվածը:
Իսկ ե՞րբ դատարան կմտնի Պերմյակովի՝ Ավետիսյանների ընտանիքի սպանության գործը. չէ որ արդեն 9 հատորն էլ թարգմանված է, Երեմ Սարգսյանն ասաց, որ իրենք ծանոթացել են փորձաքննությունների մի մասի թարգմանությանը, ամբողջական թարգմանությունները կտրամադրվեն նախաքննության ավարտից հետո:
Իսկ ե՞րբ կավարտվի նախաքննությունը, ըստ փաստաբանի, դեռևս անկանխատեսելի է, կախված է նաև այսօր անցկացված փորձաքննության եզրակացությունից:
Երեմ Սարգսյանը նշեց նաև, որ այս փորձաքննության ավարտից հետո մտադրված են մամուլի ասուլիս հրավիրել:
Նունե ԱՐԵՎՇԱՏՅԱՆ
