Ընդդեմ սահմանադրական փոփոխությունների ձեւավորված «Չեք անցկացնի» նախաձեռնության անդամներն այսօր հրապարակել են իրենց առաջիկա գործողությունների ծրագիրը:
Նախաձեռնության անդամ Արշակ Մուսախանյանը «Անդրադարձ» ակումբում ասաց, որ առաջիկա հանրահավաքը Գյումրիի թատերական հրապարակում է՝ սեպտեմբերի 25-ին, երեկոյան վեցին: Առաջիկայում հանրահավաք են նախատեսել նաեւ Երեւանում, բայց այդ մասին Արշակ Մուսախանյանը խոստացավ մանրամասներ հայտնել ավելի ուշ:
Նախաձեռնության անդամ Արմեն Գրիգորյանն էլ պատմեց, որ այս օրերին հանդիպում են քաղաքական, քաղաքացիական ուժերի հետ, որոնք միացել են «ոչ-ի» ճակատին, քննարկում են կազմակերպչական հարցեր. «Երեկ «Ժառանգության» հետ ենք հանդիպել, քննարկել, թե ինչպիսի ներդրում կարող են ունենալ հանրահավաքի կազմակերպման հարցում: Կքննարկենք նաեւ մյուս ուժերի հետ ու կնախապատրաստվենք հավաքին»:
Հարցին, թե մտավախություն չունե՞ք, որ շարժումը կարող է կուսակցականացվել, պարոն Գրիգորյանը շարունակեց. «Շարժումը քաղաքական է ու չի կարող քաղաքական հարց բարձրացվել, վախենալ դրա քաղաքականացվելուց: Քաղաքական շրջանակներում էլ պետք է քննարկվի, կուսակցականացվելուց էլ վտանգ չկա, բոլորն էլ հասկանում են, թե որն է աշխատելու արդյունավետ տարբերակը»:
Կարդացեք նաև
Հարցին, թե սահմանադրական փոփոխությունների նախագծի քվեարկության օ՞րն եք նախատեսել բողոքի ակցիա ԱԺ շենքի դիմաց, պարոն Գրիգորյանն էլի չհստակեցրեց, ասաց՝ քննարկում են այդ հարցը:
Անդրադառնալով՝ ՀՀԿ-ական պատգամավորներից Գագիկ Մելիքյանը պնդում էր, որ «Ոչ-ի ճակատը վտանգ չի ներկայացնում, որովհետեւ ներսում միասնական չեն, մի կողմից Լեւոն Տեր-Պետրոսյան, մյուս կողմից՝ Ժիրայր Սեֆիլյան հակադիր ուժերն են»՝ Արշակ Մուսախանյանը վստահեցրեց, որ պատգամավորը սխալվում է՝ ասելով, թե պառակտում կա «Ոչ-ի» ճակատի ներսում.
Շփվելով ե՛ւ ՀԱԿ-ի եւ Հիմնադիր խորհրդարանի հետ՝ տեսակետների տարբերություն չկա այս պահին: Եթե ՀՀԿ-ականներն ասում են՝ «Ոչ-ի» ճակատը վտանգ չի ներկայացնում, պարզ հարց է առաջանում՝ ինչո՞ւ էին մեր առջեւ փակել հյուրանոցների դռները: Մենք գնահատում ենք՝ նրանք անհանգստացած են, եթե մինչեւ մեր համաժողովը կար «այո»-ի ճակատ, Սերժ Սարգսյանն ու իր քաղաքական գործիչների ֆոտոսեսիա, ապա սեպտեմբերի տասներկուսից հետո ձեւավորվեց միասնական «ոչ-ի» ճակատ, ձեւավորվեց երկրորդ բեւեռ, իշխանությունները բավականին անհանգստացած են»:
Արփինե ՍԻՄՈՆՅԱՆ
