«Նորաշեն-2007» սպառողական կոոպերատիվի ղեկավարներ Լուսաբեկ Սամվելյանն ու Արմեն Թադեւոսյանը, որոնց գործունեությունից տասնյակ բնակիչներ էին տուժել, եւ որոնք այժմ այդ գործով ձերբակալված են, իրենց ցուցմունքներում սեւը սպիտակի վրա գրել են, որ Հերմինե Նաղդալյանից եւ նրա ամուսնուց՝ Դավիթ Բեգլարյանից, 300 հազար դոլար են տոկոսով վերցրել՝ փոխարենը դրա դիմաց տալով 14 բնակարան: Այսինքն՝ կոոպերատիվի ղեկավարներն իրենց կառուցած շենքից այդ բնակարանները, որոնց համար բնակիչներն արդեն իսկ վճարել էին, գրավադրել են Հերմինե Նաղդալյանի մոտ: Սակայն ամուսինները քննչական մարմնում պնդել են, թե այդ բնակարանները գնել են՝ մեկ քմ-ի դիմաց վճարելով 260 դոլար:
Դատարանը, չգիտես ինչու, կոոպերատիվի ղեկավարների ցուցմունքներն արժանահավատ չի համարել եւ հալած յուղի տեղ ընդունել է տիկին Նաղդալյանի եւ նրա ամուսնու ցուցմունքները: Ամուսինները, ճիշտ է, բնակարաններից 8-ը վերադարձրել են տերերին, քանի որ նրանց հետ եկել են համաձայնության եւ գումարի մի մասը, ինչպես բնակիչներն են հավաստիացնում, նույն բնակարանի դիմաց ստացել են, սակայն մնացած 8 բնակարանը դեռ ամուսինների ձեռքում է:
Այս գործով դատավարությունն արդեն 4-5 տարի է, ինչ ընթանում է:
Օրերս Աջափնյակ եւ Դավիթաշեն վարչական շրջանների ընդհանուր իրավասության դատարանը վճիռ է կայացրել ի վնաս այս բնակարանների սեփականատերերի, որոնց բնակարանները գրավադրված են հայտնի անձանց մոտ: Բացի Հերմինե Նաղդալյանից եւ նրա ամուսնուց՝ կան եւս հայտնի մարդիկ, որոնք ուժային կառույցի աշխատակիցներ են, եւ դատարանի վճռով նրանք էլ են արդարացվել: Բնակիչների խոսքերով՝ ովքեր պետք է վաշխառության հոդվածով դատապարտվեին, գործից մաքուր են դուրս եկել. «Հերմինե Նաղդալյանը, Գագիկ Առաքելյանը, ով ԱԱԾ պաշտոնյա է եղել, Ռազմիկ Ավագյանը այդ ցանկում են, որոնք տոկոսով գումարներ են տվել եւ մեր բնակարաններն իրենցով արել: Այդ ամբողջ գործերը ջրի երես հանելու փոխարեն՝ մեղադրող դատախազ Երիցյանն ու դատավոր Մարինե Մելքոնյանը բոլոր վաշխառուներին մաքուր են հանել: Ներկայացրել են, որ մեզ նման մաքուր ու բարեխիղճ գնորդներ են»:
Երեկ տուժած բնակիչները ՀՀ նախագահ Սերժ Սարգսյանին նամակ են հանձնել՝ պահանջելով արդար դատավարություն:
Կարդացեք նաև
Հիշեցնենք, որ կոոպերատիվի կառուցած բազմաբնակարան շենքը գտնվում է Երեւանի Գեւորգ Չավուշի 14/3 հասցեում: Կառուցապատողը շենք կառուցելու նպատակով 2007 թվականին գումարներ էր հավաքել, որի դիմաց խոստանալով բնակարաններ: Սակայն ունենալով ֆինանսական խնդիրներ՝ կոոպերատիվի տերերը սկսել էին հայտնի անձանցից տոկոսով գումարներ վերցնել՝ գրավադնելով բնակիչների բնակարանները: Բնակարաններից 24-ը գրավ էր դրվել «Էսկո Կոնցեռնի» նախագահ Սարգիս Աղաբեկյանի մոտ, որը ձերբակալվել էր վաշխառության մեղադրանքով, 14-ը՝ Հերմինե Նաղդալյանի ու նրա ամուսնու, իսկ մնացածը՝ տարբեր անձանց մոտ:
Բնակիչները 5 տարի է՝ չեն կարողանում հետ ստանալ իրենց բնակարանները, որոնք, ինչպես նրանք են ասում, չարչարանքով, դժվար վաստակած գումարներով էին գնել:
Սեփ.լր.
«Առավոտ» օրաթերթ
16.09..2015
