Հայաստանի անկախության 24-րդ տարեդարձը ՀՀ սպորտի եւ երիտասարդության հարցերի նախարարությունը Երեւանի քաղաքապետարանի հետ համատեղ կնշի մարզական մասսայական միջոցառումներով:
Նախարար Գաբրիել Ղազարյանը Aravot.am-ին տեղեկացրեց. «Սեպտեմբերի 21-ին Ազատության եւ Շահումյան հրապարակներում, Հյուսիսային պողոտայում եւ Երեւանի քաղաքապետարանի հարակից տարածքում մայրաքաղաքի բնակիչների եւ հյուրերի համար կազմակերպելու է գրեթե բոլոր մարզաձեւերի մարզական մասսայական միջոցառումներ: Նախարարությունն անցած տարի նույնպես հանգստյան օրերին մարզադպրոցների սաների մասնակցությամբ անցկացնում էր ցուցադրական ելույթներ, որոնք դրական ազդեցություն են ունեցել հատկապես մատաղ սերնդին սպորտային կյանք ներգրավելու գործում: Այս տարվա մեկնարկը համընկնում է հենց Անկախության օրվան եւ կշարունակվի այնքան ժամանակ, քանի դեռ եղանակային պայմանները թույլ կտան»:
Աշոտ ՀԱԿՈԲՅԱՆ
