«Նախարարները կիսում են իմ տեսակետը, կիրակի օրը փոխվարչապետը շատ մանրակրկիտ ներկայացրել է, էկոնոմիկայի նախարարը բոլորը ներկայացրել է: Դա տնտեսագիտական գիտելիքի խնդիր է: Դուք ուրիշ տնտեսագիտություն ունեք, ասում եք՝ ինչո՞ւ մեր ազգաբնակչության վրա չի երևում այդ սոցիալական խնդիրը, եթե 4 տոկոս տնտեսական աճ ունենանք, ապա պիտի լավ ապրի ժողովուրդը: Ես ձեզ ասել եմ, որ չի կարող 4 տոկոսով լավ ապրի մեր ժողովուրդը: Դա պետք է լինի երկնիշ թիվ, և մենք փորձելու ենք կամաց գնալ առաջ»,-այսօր խորհրդարանում, լրագրողների հետ զրույցում ասաց վարչապետ Հովիկ Աբրահամյանը: Վարչապետը նշեց, որ ամենակարևոր խնդիրն այն է, որ Հայաստանը փորձում է իր տնտեսական դիրքերը տարածաշրջանում ամուր պահել՝ չունենալով նավթ, գազ, ելք դեպի ծով:
Հարցին, որ ֆինանսների նախարար Գագիկ Խաչատրյանը հակառակն է պնդում վարչապետը պատասխանեց. «Մի հատ հարցը կտաք իրան, կնայեք՝ ինքը հակառա՞կն է պնդում»:
Վարչապետը հստակեցրեց նաեւ, որ ինքը ասել է չորս տոկոս տնտեսական աճի մասին. «Կառավարության նիստում ես ասել եմ, որ վիճակագրական ծառայությունը հրապարակել է թվեր, և ասում է՝ կիսամյակում ունենք 4 տոկոս տնտեսական աճ: Դա ես չեմ հորինել»: Հովիկ Աբրահամյանն, ի դեպ, դա ուրախալի լուր է համարում:
Նելլի ԳՐԻԳՈՐՅԱՆ
