Խաչատուր Քոքոբելյանը հիմնական զեկուցող, սահմանադրագետ Վարդան Պողոսյանից հետաքրքրվեց, թե ո՞վ է այս Սահմանադրության երաշխավորը: Չնայած նշված է, որ ՀՀ նախագահը հետեւելու է Սահմանադրությանը, բայց, ըստ նրա, հստակ ձեւակերպում չկա, թե ով է երաշխավոր լինելու. «Անտեր ոչինչ չի լինում»:
Վարդան Պողոսյանը պատասխանեց, որ որեւէ մեկը չի կարող երաշխավորել Սահմանադրությունը, բայց դա չի նշանակում, որ երկիրն անտեր է դառնում: Երկիրն անտեր է դառնում այն ժամանակ, երբ ամբողջ երկրի ճակատագիրը վստահվում է միայն մեկ անձի , երբ չկա իշխանությունների բաժանում, ու միակ հույսը ինչ-որ մեկն է դառնում:
Խաչատուր Քոքոբելյանի համար անընդունելի է ՀՀ ամբողջականության հարցը հանրաքվեի միջոցով լուծելու դրույթը: Ըստ նրա, «Սահմանադրությամբ Հայաստանի փաստացի տարածքն արդեն ամրագրված է, ու այն քննարկման թեմա չի կարող լինել:
ԱԺ փոխխոսնակ Էդուարդ Շարմազանովը հանգստացրեց Քոքոբելյանին՝ ասելով. «Կարող է ընդլայնման համար ենք գրել»:
Կարդացեք նաև
ՀՀԿ պատգամավոր Վարդան Այվազյանն էլ առաջարկեց Սահմանադրությունում ամրագրել, որ մենաշնորհներն արգելվում են, ոչ թե արգելել մենաշնորհի կամ գերիշխող դիրքի չարաշահումը: Ըստ նրա, մենաշնորհները ավերիչ ազդեցություն են թողնում տնտեսական համակարգի վրա, ուստի հստակ պետք է ամրագրել ու արգելել:
Վարդան Պողոսյանը պատասխանեց, որ չեն կարող նման բան ամրագրել. «Եթե գրենք արգելվում է, օրենսդիրը կարգավորելու որեւէ խնդիր չի ունենա: Այդ ճանապարհով գնացել է ՌԴ Սահմանադրությունը եւ սխալվել է:
Հռիփսիմե ՋԵԲԵՋՅԱՆ
