ՀՀ գյուղատնտեսության նախարար Սերգո Կարապետյանն այսօր Երևանի կոնյակի գործարանում մասնակցել է Հայաստանի կոնյակագործների միության ընդլայնված նիստին, որին ներկա էին նաև գինեգործների միության անդամներ:
«Մեր այսօրվա նիստի հիմնական նպատակը երկու միությունների միջև համագործակցության եզրեր գտնելն ու աշխատանքների առավել արդյունավետ կազմակերպումն է», – նշել է իր խոսքում նախարար Սերգո Կարապետյանը:
Նախարարի խոսքով` երկու միությունների առանձին գործունեությունը մեծ արդյունավետություն չի ապահովում և պետություն-մասնավոր հատված համագործակցությունն ավելի սերտացնելու համար նման ձևաչափով քննարկումները կարող են շատ օգտակար լինել: Սերգո Կարապետյանը հավելել է, որ տարիներ շարունակ այս ոլորտում բազում հարցեր են կուտակվել, որոնք լուծում են պահանջում և պետք է ամեն ինչ անել առաջիկայում այդ խնդիրներին լուծումներ տալու համար:
Քննարկումների արդյունքում նախարար Սերգո Կարապետյանն առաջարկել է ստեղծել նախաձեռնող խումբ և մեկամսյա ժամկետում քննարկել և ներկայացնել իրենց միասնական վերջնական դիրքորոշումը երկու միությունների միավորման նպատակահարմարության վերաբերյալ:
Կարդացեք նաև
Քննարկման ընթացքում անդրադարձ է կատարվել նաև խաղողի մթերումների ընթացքին: Այս ենթատեքստում նախարարը նշել է, որ արդեն մեկ շաբաթ է հանրապետության 3-4 մարզերում ընթացքի մեջ են մթերման աշխատանքները, և բոլոր ընկերություններն էլ պատրաստակամ են մթերել արտադրված բերքը, սակայն ներկայումս առկա են որոշակի ֆինանսական խնդիրներ: Նախարարը նաև հավելել է, որ առաջիկա մեկ շաբաթվա ընթացքում բոլոր մթերող կազմակերպությունները պետք է սկսեն մթերման աշխատանքները:
Նիստի օրակարգում էին նաև որակյալ կոնյակի արտադրության և արտահանման հետ կապված խնդիրները, ինչպես նաև մթերվող խաղողի որակի նկատմամբ հսկողության սահմանման մեխանիզմները: Խնդրի շուրջ զեկույցով հանդես է եկել Հայաստանի կոնյակագործների միության նախագահ Արա Գրիգորյանը: Զեկույցում կարևորվել է տեղական արտադրանքի որակի բարձրացումը, ինչը նպաստավոր պայմաններ կստեղծի հայկական կոնյակի արտահանման ծավալների ավելացման համար:
Արա Գրիգորյանը նաև կարևորել է ՀՀ գյուղատնտեսության նախարարության հետ նման համատեղ նիստերի իրականացումը, ինչը թույլ է տալիս բարձրաձայնել իրենց հուզող խնդիրները։
ՀՀ գյուղատնտեսության նախարարության տեղեկատվության և հասարակայնության հետ կապերի բաժին
