«Լուսավոր Հայաստան» նախաձեռնությունում հավաքված են տարբեր քաղաքացիական շարժումներից ակտիվիստներ: Այսօր, այդ մասին, խորհրդարանում լրագրողների հետ զրույցում ասաց նախաձեռնության հեղինակ, ԱԺ պատգամավոր Էդմոն Մարուքյանը`պատասխանելով լրագրողներից մեկի հարցին` ինչպե՞ս է ստացվել, որ «Լուսավոր Հայաստանում» հավաքվել են «Դեմ եմ»-ի ակտիվիստները, ու չկան նախկին կուսակցականներ: Նա հստակեցրեց, որ «Լուսավոր Հայաստանի» թիմը հավաքելիս նախապատվություն է տրվել հնարավորինս մաքուր կենսագրություն ունեցող անձանց: «Տարբեր շարժումներից մեզ մոտ մարդիկ կան, հերթով կտեսնեք, այստեղ միացել են այն մարդիկ, որոնք կիսում են «Լուսավոր Հայաստանի» գաղափարները, հիմա մի մասը կարող է լինել «Դեմ եմ»-ից, մի մասը՝ «Ոչ թալանից», կամ «Դուրս մեր գրպանից»,-ավելացրեց ԱԺ պատգամավորը:
Նա դժվարանում է այս պահին պատասխանել, թե քանի անդամ կա նախաձեռնությունում. թիվն օր օրի ավելանում է: Նախաձեռնությունն առաջիկայում, ինչպես հայտնի է, կգրանցվի որպես կուսակցություն: Ինչ վերաբերում է կուսակցության ֆինանսավորման աղբյուրներին, պատգամավորը նշեց, որ այս պահին նախաձեռնության անդամները իրենց ներդրումներն են անում, ու «քանի նախաձեռնության անդամների թիվն ավելանա, ներդրումները կավելանան»:
«Լուսավոր Հայաստանը» մասնակցելու է 2017-ի խորհրդարանական ընտրություններին:
Նելլի ԳՐԻԳՈՐՅԱՆ
