ԱԺ նիստում սեպտեմբերի 16-ին շարունակվում է քննարկվել Սահմանադրական փոփոխությունների նախագիծը:
ՀՅԴ պատգամավոր Արծվիկ Մինասյանը սահմանադրագետ Վարդան Պողոսյանին հարց ուղղեց կրթական իրավունքի մասին. «Խոսքը գնում է պարտադիր 12-ամյա կրթության մասին: Հնարավո՞ր է այնպես ձեւակերպվի, որ քաղաքացին իրավունք ունենա 12-ամյա անվճար կրթական իրավունքից օգտվել»:
Վարդան Պողոսյանը պատասխանեց, որ 37-րդ հոդվածի առաջին կետի հետ խնդիր ունեն, գրված է անվճար կրթության նվազագույն տեւողությունը 12 տարի է, նախագծի մշակման ժամանակ նկատի են ունեցել կրթական ծրագրերի նվազագույն տեւողությունը: Կարելի է նախատեսել, որ պարտադիր կրթությունը պետական ուսումնական հաստատություններում անվճար է»:
Սա լսելուն պես Հրանտ Բագրատյանը տեղից բղավեց, որ այդպիսի բան չկա, անվճար չի լինում: Վարդան Պողոսյանն էլ արձագանքեց. «Պարոն Բագրատյան, երբ մենք ասում ենք անվճար, նկատի չունենք, որ ընդհանրապես որեւէ մեկը չի վճարում, խոսում ենք անվճար՝ նայած ում տեսանկյունից: Խոսում ենք կոնկրետ անձի տեսանկյունից, ոչ թե այն տեսանկյունից, ինչի մասին դուք եք ասում»:
Կարդացեք նաև
Գալուստ Սահակյանն էլ արձագանքեց՝ կրթությունը թվերով չի կարելի չափել. «Կրթությունն իր բաղադրիչներն ունի՝ տարրական կրթություն, հիմնական կրթություն, միջնակարգ, բարձրագույն, հետբուհական: Եթե նկատի ունենք 12-ամյա միջնակարգ կրթությունը, մի օր կարող է անհրաժեշտ լինի 13 տարի սովորել, կամ 10-11 տարի»:
Նա խնդրեց Վարդան Պողոսյանին դրա վրա էլ ուշադրություն դարձնել:
Իսկ ՀՀԿ խմբակցության պատգամավոր Սամվել Ֆարմանյանն էլ առաջարկեց նախագծից հանել նախարարությունների համար սահմանված թիվը. «18 է նախատեսվում, արդյոք պե՞տք է թիվը ամրագրել, գուցե պետք է լինի 16»:
Էդմոն Մարուքյանը կառավարության անդամի քաղաքացիության ցենզի մասին հարց ուղղեց՝ չե՞ք կարծում, որ գործադիր իշխանությունում կարող էինք նաեւ սփյուռքից լավ մարդկանց բերեինք, հրավիրենք ՀՀ՝ նախարար աշխատելու, որ ռեֆորմներ իրականացնեին: Մենք հրավեր կատարելու իրավունքից զրկվում ենք՝ որպես պետություն:
Վարդան Պողոսյանը պատասխանեց՝ կառավարության անդամը միայն տեխնիկական մենեջեր չէ, նա քաղաքականություն մշակող բարձրագույն պաշտոնատար անձ է. «Կառավարությունն է որոշում ամբողջ երկրի ներքին եւ արտաքին քաղաքականությունը եւ մանավանդ Հայաստանի պայմաններում թույլ տալ, որ կառավարության անդամը լինի այլ երկրի քաղաքացի կամ լինի երկքաղաքացի, իմ անձնական կարծիքով թույլատրելի չէ: Սահմանադրական հանձնաժողովում էլ համապատասխան որոշում ընդունվեց»:
Նա ասաց՝ պատկերացրեք, ինչպե՞ս կարող է ՀՀ ՊՆ նախարարը լինել այլ երկրի քաղաքացի:
Հռիփսիմե ՋԵԲԵՋՅԱՆ
