Սեպտեմբերի 16-ին ԱԺ նիստում ՀԱԿ խմբակցության ղեկավար Լեւոն Զուրաբյանը սահմանադրագետ Վարդան Պողոսյանին մեղադրեց երեկ նիստի ընթացքում հրապարակային կեղծ տեղեկություն տրամադրելու մեջ:
Նա պատասխանելով Արամ Մանուկյանի հարցին՝ ասել էր, որ Սերժ Սարգսյանը հայտարարել է, թե չի ձգտում դառնալ ԱԺ նախագահ, վարչապետ կամ նախագահ: Լեւոն Զուրաբյանի խոսքերով՝ Սերժ Սարգսյանը երբեք հրապարակային չի ասել, որ չի ձգտում ԱԺ նախագահի պաշտոնին. «Պետք չէ ապատեղեկացնել մեր հանրությանը»:
Հիշեցնենք, որ նիստում շարունակվում են Սահմանադրական փոփոխությունների նախագծի քննարկումները:
Վարդան Պողոսյանը հերքեց Զուրաբյանին՝ ասելով, որ որեւէ կեղծ տեղեկություն չի տրամադրել ԱԺ-ում. «Դա հանրահայտ փաստ է, որը հաստատվել է ՀՀ նախագահի կողմից տարբեր կանալներով»:
Կարդացեք նաև
Լեւոն Զուրաբյանը տեղից բղավեց, որ ասել եք՝ հրապարակային հայտարարել է: Վարդան Պողոսյանը բարկացավ, հորդորեց լսելու ունակություն ունենալ եւ պահպանել էթիկայի կանոնները. «Ես պնդում եմ, որ ՀՀ նախագահը հանրության համար հայտարարել է, որ ինքը չի հավակնում ԱԺ նախագահի պաշտոնին, եթե անցում է կատարվում խորհրդարանական կառավարման համակարգի: Հետեւաբար կեղծ տեղեկությունների մասին պնդումները մնում են ձեր խղճի վրա»:
Զուրաբյանը տեղից ճշտեց՝ իսկ հանրությունն ո՞վ ա:
Գալուստ Սահակյանը արձագանքեց. «Համենայնդեպս, դուք չեք, մի խանգարեք»:
Հռիփսիմե ՋԵԲԵՋՅԱՆ
