«Ի՞նչ է նշանակում Սերժ Սարգսյանի փաստաբաններ, երեսներին չլինի ասել՝ միջազգային ճանաչում ունեցող սահմանադրագետներ են, կարծում եմ նրանք ներողամտորեն կվերաբերվեն այս գռեհիկ արտահայտություններին եւ իրենց գերազանց գործը տրամաբանական ավարտին կհասցնեն»,- ՀՀԿ խմբակցության անդամ Արտաշես Գեղամյանն ԱԺ նիստում այսպես արձագանքեց «Ժառանգության» պատգամավոր Զարուհի Փոստանջյանի քննադատությանը, որը դժգոհել էր, որ Սերժ Սարգսյանը, լինելով Սահմանադրության նախագծի հեղինակը, չի եկել նիստին, այլ ուղարկել է իր փաստաբաններին:
Իսկ նախագահին ներկայացնող փաստաբաններից մեկը սահմանադրագետ Վարդան Պողոսյանն էր, որը մանրամասն ներկայացրեց ամբողջ նախագիծը:
ԲՀԿ խմբակցության նախագահ Նաիրա Զոհրաբյանը հետաքրքրվեց՝ երկրորդ փուլ ձեւակերպումը ինչպիսի՞ն է լինելու, Սահմանադրության տեքստից հանվելո՞ւ է երկրորդ փուլ, կայուն մեծամասնություն արտահայտությունը, թե՞ ոչ:
Վարդան Պողոսյանը պատասխանեց. «89 հոդվածի առաջին եւ երկրորդ մասերը որեւէ փոփոխության չեն ենթարկվել, 3-րդ մասը ունի հետեւյալ տեսքը՝ Ազգային ժողովն ընտրվում է համամասնական ընտրակարգով: Ընտրական օրենսգիրքը երաշխավորում է կայուն խորհրդարանական մեծամասնության ձեւավորումը: Եթե ընտրության արդյունքում կամ քաղաքական կոալիցիա կազմելու արդյունքում կայուն մեծամասնություն չի ձեւավորվում, ապա կարող է անցկացվել ընտրության երկրորդ փուլ: Իմպերատիվ պահանջը նախագծի չկա»:
Կարդացեք նաև
Ի դեպ, նիստի ընդմիջումից հետո նիստերի դահլիճը կիսադատարկ էր արդեն: Գալուստ Սահակյանը հեգնեց ընդդիմությանը, թե երեւի ուղիղ եթերի իրենց առաջարկը չընդունելուց հետո նեղացել, չեն եկել. «Պիտի հատկապես նշվի, որ քաղաքական մեծամասնությունը բավականին լավ է աշխատել, մի քանի քննարկումներ է անցկացրել այս օրերի ընթացքում: Նրանք, ովքեր ավելի շատ դեմ են արտահայտվում կամ ավելի շատ առաջարկություններ ունեն, առանց Հ1-ի էլ կարող էին գալ ու մասնակցել»:
Երբ մատնանշեցին, որ ՀՀԿ-ի շարքերն էլ են դատարկ, Գալուստ Սահակյանը պատասխանեց, որ ՀՀԿ-ն այնքան է մասնակցել, որ կարող էին այսօր չգալ էլ:
Հռիփսիմե ՋԵԲԵՋՅԱՆ
