26-ամյա ծննդկան Մերի Մարգարյանի մահվան դեպքի առթիվ նշանակված դատաբժշկական փորձաքննության եզրակացությունը պատրաստ է։
Այս մասին, երեկ պատասխանելով մեր հարցին, ասաց տուժողի իրավահաջորդի ներկայացուցիչ Մարինե Թովմասյանը։
Հղիության 35-րդ շաբաթում գտնվող 26-ամյա ծննդկանը մահացել է հուլիսի 29-ին։ Ըստ պաշտոնական հաղորդագրության՝ Մերի Մարգարյանը 4 օր շարունակ ունեցել է բարձր ջերմություն, սակայն բժշկական օգնություն եւ սպասարկում իրականացնող «Շենգավիթ» ԲԿ բժշկուհի Շուշանիկ Բախշյանը, պարտավոր լինելով կնոջը հոսպիտալացնել, հրաժարվել եւ չի կատարել իր պարտականությունները, ինչի հետեւանքով Մերի Մարգարյանը հուլիսի 29-ին մահացել է, իսկ հաջորդ օրը մահացել է նաեւ նրա նորածին դուստրը։
Երեկ Մարինե Թովմասյանը պատասխանեց սույն գործի վերաբերյալ մեր մի քանի հարցերին։
Կարդացեք նաև
– Մարինե, նշեցիք, որ դիակի դատաբժշկական փորձաքննության եզրակացությունը պատրաստ է: Ծանոթացե՞լ եք արդյունքներին։
– Վաղը (այսօր.– Տ. Խ.) ժամը 10:00-ին հրավիրվել ենք ծանոթանալու դատաբժշկական փորձաքննության եզրակացությանը։ Այն պատրաստ է, քննիչի մոտ է: Փորձաքննության եզրակացությունը չի ուշացել, որովհետեւ փորձագետները մինչեւ 30 աշխատանքային օր իրավունք ունեն իրականացնել իրենց հետազոտությունները եւ եզրակացություն տալ։ Դրա համար մինչեւ սեպտեմբերի 10-ը սպասում էինք եզրակացությանը։
– Տեղյա՞կ եք, թե այս ընթացքում սույն քրեական գործի շրջանակներում ի՞նչ քննչական գործողություններ են իրականացվել։
– Տեղյակ չեմ, որովհետեւ մեզ հետ արդեն ավարտվել է նախնական փուլի գործողությունները՝ կապված հարցաքննությունների հետ։ Վաղը գուցե եզրակացությանը ծանոթանալուց հետո քննչական գործողություններ կսկսվի։ Մենք ուղղակի գիտենք, որ բժիշկներ են հարցաքննվել, այսինքն` ընթացիկ հարցաքննությունների մասին ենք տեղեկացվում, այլ տեղեկությունների չենք տիրապետում։
– Այսինքն հարցաքննվե՞լ են նաեւ տուժողի իրավահաջորդները:
– Այո, Մերի Մարգարյանի հարազատները ի սկզբանե հարցաքննվել են։ Չի բացառվում, որ ընթացքում լրացուցիչ հարցաքննությունների անհրաժեշտություն լինի եւ նորից հարցաքննվեն:
Տաթեւ ԽԱՉԱՏՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
