Սեպտեմբերի 13-ին Փարիզում տեղի ունեցած Եվրոպայի խորհրդի խորհրդարանական վեհաժողովի (ԵԽԽՎ) սոցիալական և առողջապահական հարցերի հանձնաժողովի նիստում այս անգամ չքննարկվեց Սարսանգի ջրամբարի վերաբերյալ՝ Միլիցա Մարկովիչի խնդրահարույց զեկույցը:
Նշենք, որ այս զեկույցը ադրբեջանցիները նստաշրջանից նստաշրջան դնում են շրջանառության մեջ, մինչդեռ զեկուցողն այդպես էլ չի այցելել Լեռնային Ղարաբաղ տեղում ծանոթանալու Սարսանգի ջրամբարի հետ կապված հարցերին:
Սարսանգի ջրամբարը
Aravot.am-ի հետ զրույցում ԵԽԽՎ հայաստանյան պատվիրակության անդամ, ԲՀԿ խմբակցության պատգամավոր Վահան Բաբայանը տեղեկացրեց, որ հանձնաժողովի նիստի օրակարգում Սարսանգի ջրամբարի հետ կապված հարց չի եղել, նիստին ներկա չի եղել նաև համազեկուցողը:
Վահան Բաբայանը մեզ փոխանցեց հայաստանյան պատվիրակության այն մոտեցումը, որ զեկուցողն անպայման պետք է այցելի ԼՂՀ, այնուհետև ներկայացնի զեկույցը, որպեսզի այն չլինի միակողմանի:
Կարդացեք նաև
Սակայն պարոն Բաբայանը մտահոգություն ունի, որ Ադրբեջանի վարած խավիարային դիվանագիտությունն իր սև գործն արել է: Այս առիթով նա փոխանցեց. «Խավիարային դիվանագիտության վերջին հետևանքները ԵԽԽՎ-ում դիտվում են, և մտահոգություն կա, որ սա կարող է լինել միակողմանի և արդեն կանխավ որոշված զեկույց: Բայց մենք այս հարցը բազմիցս բարձրացրել ենք. և′ նախորդ նստաշրջանին, և′ հանձնաժողովի նիստին այդ հարցը քննարկվել էր և որոշում կայացվել, որ Միլիցա Մարկովիչը պիտի այցելի ԼՂՀ»:
Վահան Բաբայանի փոխանցմամբ՝ այս նիստին ադրբեջանցիները համեմատաբար զուսպ են եղել, բարձրացրել են իրենց ներքին խնդիրներին և ԼՂ հակամարտությանը վերաբերող հարցեր: Նիստին քննարկվել է նաև մեկ մտահոգիչ առաջարկ՝ հանձնաժողովի նիստերը փակ անցկացնելու գաղափարը: Այն դրվել է քվեարկության, բայց չի ընդունվել:
Հետաքրքրվեցինք՝ այս նախաձեռնության հարցում ադրբեջանցիների մատը խա՞ռն է, պարոն Բաբայանը պատասխանեց. «Այդ առաջարկը ներկայացրել է հանձնաժողովի նախագահը, բայց ես դեմ եմ եղել այդ նախաձեռնությանը՝ նաև հաշվի առնելով Սարսանգի ջրամբարի նախագիծը, որ չի կարելի փակ դռների ետևում նման կարևոր նախագիծ քննարկվել»:
Վահան Բաբայանը տեղեկացրեց, որ Սարսանգի ջրամբարի հետ կապված զեկույցը հնարավոր է կրկին քննարկման դրվի սեպտեմբերի 27-ից հոկտեմբերի 2-ը անցկացվելիք՝ ԵԽԽՎ աշնանային նստաշրջանին:
Տաթև ՀԱՐՈՒԹՅՈՒՆՅԱՆ
