Ադրբեջանի Միլի մեջլիսի խոսնակ Օգթայ Հասադովն առաջարկել է այդ երկրի կառավարության առջեւ բարձրացնել ԵՄ-ի «Արեւելյան գործընկերություն» ծրագրին մասնակցելու անհրաժեշտության ուսումնասիրման հարցը: Այս տեղեկությունը հաղորդել է Sputnik.az-ը:
Նրա խոսքերով՝ Եվրախորհրդարանը «սեպտեմբերի 10-ին Ադրբեջանի ներքին գործերին խառնվելու անամոթ փորձով անցել է միջազգային իրավունքի բոլոր սահմանները»:
Հիշեցնենք, որ սեպտեմբերի 10-ին Եվրախորհրդարանը բանաձեւ է ընդունել, որում հիշատակվում է մարդու իրավունքների աղետալի վիճակն Ադրբեջանում, նշվում է նաև քաղաքացիական հասարակության, լրատվամիջոցների ներկայացուցիչների նկատմամբ գործադրվող ճնշումների մասին։
Հասադովն ուշադրություն է հրավիրել այն փաստի վրա, որ սեպտեմբերի 10-ին Եվրախորհրդարանի արտահերթ նիստին ապահովված է եղել խորհրդարանակաների առավելագույն մասնակցություն: «Հատուկ ակտիվությամբ կրկին առանձնացել է Եվրախորհրդարանի փոխնախագահ, Եվրոպայի կանաչների կուսակցության անդամ Ուլրիկե Լունաչեկը եւ երկու խորհրդարանականներ, որոնք սեպտեմբերի 1-ին անօրինական այց են կատարել Ադրբեջանի օկուպացված տարածքներ»:
Կարդացեք նաև
Միլի մեջլիսի խոսնակը կարծիք է հայտնել, որ այդ մարդկանց գործողությունները հետեւում Հայաստանն է կանգնած: Նա նաեւ նշել է, որ Եվրախորհրդարանի նիստի ընթացքում հնչած ելույթների մեծամասնությունը հիմնված են սխալ տեղեկատվության վրա:
«Եվրոպական կառույցների կողմնակալ վերաբերմունքը եւս մեկ անգամ ապացուցվեց, երբ ԵԱՀԿ/ԺՀՄԻԳ-ը վերջերս հրաժարվեց նոյեմբերին Ադրբեջանում կայանալիք խորհրդարանական ընտրությունների համար դիտորդներ ուղարկել: Այս քայլը միջազգային համընդհանուր նորմերի կոպիտ խախտում է: Մի շարք ուժեր ցանկանում են նախօրոք հարցականի տակ դնել Միլի մեջլիսի ընտրությունների արդյունքները: Ես ցանկանում եմ հայտարարել, որ Ադրբեջանի ապագան ադրբեջանցիների ձեռքերում է»:
Պատրաստեց Աշոտ ԻՍՐԱԵԼՅԱՆԸ
