Վաղվանից ՀՀ ֆինանսների նախարարությունը Գյումրիում կսկսի ստուգումներ, որոնք կտեւեն ուղիղ 40 օր: Այս մասին մեզ հետ զրույցում տեղեկացրեց Գյումրու հագուստեղենի խանութներից մեկի հաշվապահը: Նրան պարզաբանել են, որ հերթական ստուգումներ են ու ընդգրկված են քաղաքի բոլոր սպասարկման օբյեկտները:
Սակայն հարկայինի մեր աղբյուրների տեղեկացմամբ էլ, 40 օրով Գյումրիում հյուրընկալվող Ֆինանսների նախարարության վերահսկող մարմինը նախեւառաջ ստուգումներ կանցկացնի Գյումրու տարածքային հարկային տեսչությունում, Գյումրու խոշոր խանութներում ու ձեռնարկություններում: Մայրաքաղաքից գալիս են պարզելու, թե ինչպե՞ս են տեղի հարկահավաքներն աշխատել Գյումրու խոշոր խանութների հետ՝ արդյոք մուտքերը ճի՞շտ են արված, արդյոք խանութների տերերը հարկերն ամբողջությա՞մբ են մուծել պետական բյուջե, թե՞ տեղի հարկայինի հետ փոխադարձ պայմանավորվածության արդյունքում հարկերի կեսը մուծել են, կեսը՝ ոչ:
Չի բացառվում, որ այս նպատակով Ֆինանսների նախարարությունը մոնիտորինգ անցկացնի, օրինակ՝ 40 օր շարունակ անձամբ հետեւեն խոշոր խանութների առեւտրի ծավալներին:
Նունե ԱՐԵՎՇԱՏՅԱՆ
