Այսօր Ախթալայում կայացավ խորովածի 7-րդ փառատոնը, որին մասնակցում էին 23 տաղավարներ: «Beer Academy» գարեջուր արտադրող ընկերությունն էլ ճանաչվեց փառատոնի հաղթող, որը մրցույթին ներկայացրել էր տավարի չալաղաջ:
Խորովածը պատրաստած խոհարար Աշոտ Թումասյանը` չբացահայտելով իր խոհարարական գաղտնիքը Aravot.am-ի լրագրողին ասաց, որ բաղադրատոմսը հայկական չէր, որը փոքր ինչ հայկականացրել էր:
Փառատոնի համակազմակերպիչ Սեդրակ Մամուլյանն այս փառատոնին իր հարազատ գյուղի խորովածն էր հավանել: Մեր այն հարցին, թե այսօրվա ձեր նախընտրած խորովածը ինչով էր առանձնանում, պարոն Մամուլյանը պատասխանեց. «Ես ընդհանրապես գառի միս եմ սիրում եւ ինձ դուր եկավ Խոխմելի գյուղի խորովածը, այս գյուղը նաեւ իմ հարազատ գյուղն է, եւ երեւի այդ էր պատճառը, որ նրանք միշտ պատրաստված են եւ մասնակցում են միջոցառմանը»:
Գառան խորովածը Խոխմելիի ուրցով համեմված, ըստ Սեդրակ Մամուլյանի, մնացած տարածաշրջանի ուրցի համերից տարբերվում է նրանով, որ այն նաեւ կիտրոնահամ է: «Մենք կարող ենք ներկայանալ աշխարհին մեր բնաշխարհում աճած բույսերից ստացված համեմունքներով, քանի որ մեր երկիրն ունի տարբեր բնակլիմայական գոտիներ, որը հնարավորություն է տալիս նույն խոտաբույսը տարբեր տարածաշրջաններում տարբեր համ ու բույր ունենա, որը կերակուրին յուրօրինակ համ է տալիս»:
Կարդացեք նաև
Պարոն Մամուլյանի խոսքերով, եթե ամեն տարի խոհարարներին հորդորել են փառատոնին մասնակցել, ապա այս տարի Երեւան քաղաքի եւ մի քանի մարզերի ռեստորանների խոհարարներ իրենք են ինքնակամ մասնակցել:
Նշենք նաեւ, որ լրագրողների այցը Ախթալա կազմակերպել էր G2IA (Հայկական միջմասնագիտական միջազգային խմբավորում) ֆրանսիական կազմակերպությունը:
Անուշ ՄԱԹԵՎՈՍՅԱՆ
