«Արմնյուզն ունի պայմանագիր «Ա1+»-ի հետ կոնկրետ հաղորդում արտադրելու համար: Նախ դա շատ սահմանափակ եթերային ժամանակ է: «Ա1+»-ը, եթե հիշում եք 24-ժամյա հեռարձակում էր իրականացնում, հիմա ինքը ունի ընդամենը կես ժամ»,- այս մասին «Իրազեկ քաղաքացիների միավորում» ՀԿ-ի կազմակերպած «Արտաքին քաղաքականություն եւ լուսաբանում» թեմայով սեմինարի ընթացքում ասաց Երեւանի մամուլի ակումբի նախագահ Բորիս Նավասարդյանը:
Լրագրողները պարոն Նավասարդյանից, մասնավորապես հետաքրքրվեցին, թե արդյո՞ք խոսքի ազատության համար ձեռքբերում է այն, որ 2002 թվականին լիցենզիայից զրկված «Ա1+» հեռուստաընկերությունն այժմ կրկին հնարավորություն ունի փոքրիկ հաղորդում եթեր հեռարձակել:
Երեւանի մամուլի ակումբի նախագահը նշեց. «Ամեն դեպքում միջավայրը, որտեղ դու դնում ես քո արտադրանքը, եթե հոգեհարազատ չէ, դու էլ ես փոխվում: Եվ ինձ թվում է «Ա1+»-ի թողարկած հաղորդումը «Արմնյուզ»-ով դժվար է համեմատել «Ա1+»-ին հաղորդումներին մինչեւ 2002 թվականի մարտը: Եվ նույնիսկ այն, ինչ նրանք ինտերնետում են դնում, խիստ տարբերվում է «Արմնյուզի» հաղորդումներից»:
Բորիս Նավասարդյանը նաեւ կարեւորեց լրագրողների աշխատանքի միջավայրը. «Եթե դու մի ժամով մտնում ես ինչ-որ տեղ եւ շուրջն ամեն ինչ խորթ է, դա չի աշխատում»:
Կարդացեք նաև
Որոշ տեղեկություններով «Արմնյուզ»-ի եթերով հեռարձակվող «Ա1+»-ի «Այբ-ֆե+» հաղորդումն ամեն օր դիտում են մի քանի տասնյակ հազար հեռուստադիտողներ: Ըստ Բորիս Նավասարդյանի՝ եթե դա «Ա1+»-ի ալիքը լիներ, շատ ավելի մարդ կդիտեր. «Քանի որ մարդիկ կիմանային, որ ոչ թե կոնկրետ ժամին պետք է մտնեն այնտեղ, այլ մշտապես»:
Աշոտ ԻՍՐԱԵԼՅԱՆ
