ՀՀԿ-ական պատգամավորը «Ոչ թալանին»-ին լրջանալու կոչ է անում
«Մարդու իրավունքների տեսանկյունից ենք եթե նայում, նկատի ունեցեք, որ մարդու իրավունքները շատ բազմաձեւ են: Այո, երբ խաղաղ ցուցարարները փակում են Բաղրամյանը կամ որեւէ այլ փողոց, նրանք իրավունք ունեն իրենց բողոքն, իրենց ասելիքը արտահայտել նաեւ նստացույցի կամ այդ փողոցում, հրապարակում կանգնելու ձեւով: Դա նույնպես պայքարի ձեւ է եւ տեղավորվում է հենց իրենց իրավունքների շրջանակում: Բայց, մյուս կողմից, ոստիկանությունը նույնպես ունի իրավունքներ եւ պարտականություններ: Բոլոր այն քաղաքացիները, ովքեր պիտի դպրոց, աշխատանքի, հիվանդանոց գնան հատկապես այդ փողոցով, նրանք նույնպես ազատ տեղաշարժի իրավունք ունեն»,-Aravot.am-ի հետ զրույցում ասաց ԱԺ մարդու իրավունքների պաշտպանության եւ հանրային հարցերի մշտական հանձնաժողովի փոխնախագահ Մարգարիտ Եսայանը`պատասխանելով հարցին`լուսադեմին ոստիկանությունը հարկադրանքով Բաղրամյան պողոտայից հեռացրեց խաղաղ ցուցարարներին . մարդու իրավունքների տեսանկյունից անհամաչափ չէի՞ն ոստիկանության գործողությունները, քանզի ՀՀ սահմանադրությունը ՀՀ քաղաքացիներին իրավունք տալիս է խաղաղ հանարահավաքներ, տարբեր ակցիաներ իրականացնել:
«Ոչ թալանին» նախաձեռնության անդամները, հիշեցնենք, երեկ կրկին փակել էին Բաղրամյան պողոտան`պայքարելով էլեկտրաէներգիայի սակագնի թանկացման դեմ:
Ինչ վերաբերվում է բողոքի ակցիային, Մարգարիտ Եսայանի տպավորությամբ այն «տարօրինակ հանպատրաստից եւ օրվա հետ բացարձակ կապ չունեցող» էր. «Ջահելությունը`տարիքային գործոնը, կարծում եմ այստեղ մեծ դեր է խաղացել: Որովհետեւ, իմ կարծիքով, որքան հետեւել եմ, վատ կազմակերպված, անհաջող ցույց էր: Ես տեսա, որ ոստիկանները շատ ավելի շատ էին, քան ցուցարարները: Նորից վեր կենալ եւ խոսել այդ խնդրի մասին հիմա, երբ կառավարությունը որոշ լուծումներ տվել է եւ դեռ փնտրում է, ինձ թվում է շատ անտեղի է: Ուղղակի անհասկանալի է: Երիտասարդները, եթե ինչ-որ տեղից ուղղորդվում են, ապա շատ ոչ բարի տեղից են ուղղորդվում: Ճիշտ կլիներ, որ երիտասարդներն իրենց ուժն ու հնարավորություններն օգտագործեն ավելի լրջորեն»:
Կարդացեք նաև
Սոցիալական ցանցերից մեկում Մարգարիտ Եսայանը մի գրառում է կարդացել. այն շատ արդիական է թվացել պատգամավորին ու լրիվ համամիտ է. «Երբ կգա իսկական հեղափոխության ժամանակը, մենք չենք ունենա որեւէ գաղափար կրող, որը կանի այդ հեղափոխությունը»:
ՀՀԿ-ական պատգամավորը գտնում է, որ չի կարելի այդքան էժանացնել հանրահավաքի, բողոքն արտահայտելու հնարավորությունները: Երեկվա ցույցը, պատգամավորի կարծիքով, էժանացնում էր այդ հնարավորությունները:
Մեր հարցին, չե՞ք կարծում, որ քանի դեռ էլեկտրաէներգիայի թանկացման հարցը վերջնական լուծում չի ստացել, ճիշտ են անում երիտասարդները, որ «ձեռքը պուլսին» են պահում, մեր զրուցակիցը պատասխանեց. «Միանշանակ: Ու դա լրիվ տեղավորվում է մարդու իրավունքների տրամաբանության մեջ: Բայց մեկ անգամ եւ ընդմիշտ եկեք հասկանանք, որ մայրաքաղաքի գլխավոր փողոցը փակելը արդեն շատ վատ ավանդույթ է դառնում: Բարեբախտաբար, փողոց փակելու այս գործընթացներում մեր ոստիկանությունը սովորեց ավելի պրոֆեսիոնալ աշխատել: Գիտեք, որ կոպիտ ուժի որեւէ գործադրում չի եղել, որեւէ ցուցարար մարմնական վնասվածք չի ստացել, ու դա գովելի է: Բայց բողոք արտահայտել, իհարկե կարելի է եւ հասարակության ներկայացուցիչները պարտադիր պիտի արտահայտեն իրենց դժգոհությունները, բայց ոչ մայրաքաղաքի հիմնական մայրուղին փակելով: Բողոք արտահայտելու բազմաթիվ ձեւեր կան: Կարծում եմ, մեր երիտասարդները շատ գրագետ են եւ ժամանակի ընթացքում կգտնեն այդ ձեւերը: Անընդհատ նույն բանն անելը ես բացատրում եմ իրենց անփորձությամբ: Կարծում եմ, ճիշտ կլինի, որ մի քիչ լրջանան»:
Նելլի ԳՐԻԳՈՐՅԱՆ
