Արմեն Գրիգորյանի կարծիքով՝ «Ոչ»-ի ճակատի ձեւավորումը կարելի է համարել հաջողված
«Չեք անցկացնի» նախաձեռնությունը սեպտեմբերի 12-ին հրավիրել է «Ոչ-ի» ճակատի համաժողով: Համաժողովին ներկա են «Ժառանգություն», «ՀԱԿ», «ԱԻՄ», «Հայազն» կուսակցությունները, «Հիմնադիր խորհրդարանը», «Ոտքի Հայաստան» քաղաքացիական նախաձեռնությունը, քաղաքացիական ակտիվիստներ եւ քաղաքական գործիչներ:
Հիշեցնենք, որ նախաձեռնությունը դիմել էր մի շարք հյուրանոցների, սակայն նրանք դահլիճ չեն տրամադրել, այդ պատճառով էլ համաժողովը կազմակերպվել էր ՀԺԿ գրասենյակում:
Համաժողովի ընթացքում «Չենք անցկացնի» նախաձեռնության անդամ Արմեն Գրիգորյանը հայտարարեց, որ «Ոչ»-ի ճակատի ձեւավորումը կարելի է համարել հաջողված. կարողացել են մի պլատֆորմում հրավիրել քաղաքական եւ քաղաքացիական գործիչներին. «ՀՀ-ում այնպիսի մարդ չկա, որ չգիտակցի, որ սահմանադրական փոփոխությունները կատարում են Սերժ Սարգսյանի վերարտադրության համար, այդ վերարտադրությունը կանխելու համար պետք է կարողանանք համախմբվել եւ համատեղ աշխատել»:
Կարդացեք նաև
Նա նշեց, որ առաջարկվող համակարգը որեւէ կապ չունի խորհրդարանական մոդելի հետ, ըստ նրա, առաջարկվող տարբերակով Հայաստանը պետք է բռնի Հյուսիսային Կորեայի ճանապարհը. «Ամենալավագույն տարբերակը փողոց ձեւավորելն է: Փողոցում քննարկումներ սկսելը, իշխանությունը պետք է պատասխան տա, թե ինչ է արել, դրան պետք է պատասխան տա, ոչ թե սահմանադրական փոփոխությունների վերաբերյալ փաստարկներ ներկայացնի»:
Արմեն Գրիգորյանը հայտարարեց, որ գործողությունների շարք է ձեւավորվում, նշմարվում են նաեւ Գյումրիում ցույց կազմակերպելու փորձեր, ըստ նրա ամենաընդդիմադիր քաղաքից կսկսվեն ցույցերը: «Մենք ցույց կտանք դասականներին, որ ոչ կա եւ այդ ոչ-ը հաղթելու է»,- ասաց նա՝ անդրադառնալով ԱԺ նախագահ Գալուստ Սահակյանի հայտարարությանը:
Ամի ՉԻՉԱԿՅԱՆ
