Քիչ առաջ լրացավ ոստիկանության՝ Երևանի Բաղրամյան պողոտայում հավաքված ցուցարարներին՝ երեկ գիշեր տրված ժամանակը: Ոստիկանությունը նորանոր ուժեր է կենտրոնացնում Բաղրամյան պողոտայում: Մի կողմից վահաններով ու սաղավարտներով ոստիկաններն են պատ կազմել, մյուս կողմից՝ ցուցարարները:
Հայտարարությամբ հանդես եկավ Երևանի փոխոստիկանապետ Վալերի Օսիպյանը: Նա ցուցարարներին ևս կես ժամ ժամանակ տվեց պողոտայի անօրինական արգելափակումը վերացնելու համար, հավաքը տեղափոխելու Ազատության հրապարակ, կամ Բաղրամյանի ոչ երթևեկելի մաս: Նա եզրափակեց. «Ինքնակամ հեռացնել արգելափակումը, հակառակ դեպքում ոստիկանությունը ստիպված կլինի օրենքով իրեն վերապահված միջոցներով, այդ թվում նաև հատուկ միջոցներով վերացնել այն»:
Սակայն ցուցարարները հրաժարվում են դա անել: Ավելին, վրդովված հայտարարեցին, որ եթե ուզում են հավաքը ցրել, ապա այդ դեպքում ինչո՞ւ են ոստիկաններն իրականացնում շղթա ակցիան և ինչո՞ւ են երկու կողմից փակել Բաղրամյանը:
Պողոտայում է Վաղինակ Շուշանյանը, նա ոստիկան է պահանջում, քանի որ գարեջրի շշով մարդ են հայտնաբերել, որն ուզում է անցնել, սակայն ոչ մի արձագանք: Թե ոստիկանները, թե ցուցարարները սպասում են սահմանված կես ժամի լրանալուն: Ոստիկանությունը լրատվամիջոցների ներկայացուցիչներին ևս խնդրեց դուրս գալ Բաղրամյան պողոտայի երթևեկելի մասից` ընդունել աջ ու ձախ, որպեսզի չխոչընդոտեն ոստիկանության գործողություններին ու պահանջներին:
Կարդացեք նաև
Մի քանի տասնյակ ցուցարարները կոչ են անում. «Սթափվեք», «Գժուկներ, սթափվեք», «Ոչ, լույսի թանկացմանը»:
Սահմանված կես ժամը լրանալուց հետո ոստիկանները ճեղքեցին ցուցարարների պատը և նրանց հարկադրաբար հեռացրին երթևեկելի հատվածից: Մի ցուցարար աղջիկ ուշագնաց եղավ:
Ոստիկանները ձեռքերը ոլորելով հերթով տանում են ցուցարարներին: Այժմ ոստիկաններն են պատ կազմել միայն, լրագրողներին ևս հրավիրում են մայթ:
Ի դեպ, այս անգամ ոստիկանությունը չկիրառեց ջրցան մեքենաներ. դրանք հայտնվեցին միայն Բաղրամյան պողոտայում երթեւեկությունը վերականգնելու համար՝ այն մաքրելու համար:
Տաթև ՀԱՐՈՒԹՅՈՒՆՅԱՆ
