«Մենք Ռուսաստանի հետ համագործակցում ենք ռազմական ոլորտում եւ համապատասխանաբար Ռուսաստանից գնում եւ ստանում ենք զենք: Այստեղ որեւէ նոր բան չկա: Իսկ այն, որ Ռուսաստանը զենք է վաճառում Ադրբեջանին եւ այլ երկրներից, նույնպես բնական է, որովհետեւ Ռուսաստանը զենք արտադրող պետություն է»,- այս հայտարարությունը BBC-ի ռուսական ծառայության հետ զրույցում արել է Հայաստանի արտաքին գործերի նախարար Էդվարդ Նալբանդյանը:
Նա նշել է, որ Ռուսաստանը սպառազինությունների շուկայում շատ ակտիվ ներկայություն ունի: «Ասել, որ մեզ դուր է գալիս, որ այդ զենքն Ադրբեջանն է գնում, իհարկե ոչ: Բայց, հավանաբար, դա առեւտրի եւ բիզնեսի հարց է: Մեր հարաբերությունները Ռուսաստանի հետ դաշնակցային են: Հարաբերությունները դաշնակցային անվանելը նույնպես շատ բան է նշանակում»։
Լրագրողը ՀՀ ԱԳ նախարարից հարցրել է, թե Հայաստանի Եվրամիությանն ինտեգրվելու ճանապարհը արդյոք փակ է: Էդվարդ Նալբանդյանը պատասխանել է, որ Եվրասիական տնտեսական միությանը Հայաստանն անդամակցել է, քանի որ ուներ ռազմավարական շահեր. «Այն ինչը չի հակասի ԵՏՄ-ում եւ այլ ինտեգրացիոն միություններում մեր ստանձնած պարտավորություններին, մենք առավելագույնս զարգացնել Եվրոպական միության հետ»:
Անդրադառնալով Արեւմուտքի կողմից Ուկրաինայի հարցով Ռուսաստանի դեմ կիրառված պատժամիջոցներին, Էդվարդ Նալբանդյանը նշել է, որ դա խնդրի լուծման ճանապարհ չէ. «Հարցերը պետք է լուծել երկխոսության, բանակցությունների միջոցով: Դա ցանկացած հակամարտության եւ տարաձայնությունների լուծման լավագույն ճանապարհն է»:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
