Եթե մտադրություն ունեք գործ ունենալու Ամերիաբանկի հետ, ապա պատրաստ եղեք, որ շատ հավանական է, որ այդպես էլ չստանաք ձեզ հուզող հարցերի պատասխանները:
Օրինակ՝ ձեր այն հարցին, թե կարո՞ղ եք արդյոք ավանդ ձեւակերպել Ամերիաբանկում, կարող է եւ լսեք այսպիսի պատասխան.
Շնորհակալություն Ձեր դիրքորոշման համար: Բանկը շատ է կարեւորում իր ներկա եւ պոտենցիալ հաճախորդների կարծիքը եւ այն ընդունում է ի գիտություն՝ հետագա քայլերի համար:
Կհարցնեք՝ ինչպե՞ս կարող եք վարկ վերցնել, իսկ ձեզ կպատասխանեն.
Շնորհակալություն Ձեր դիրքորոշման համար: Բանկը շատ է կարեւորում իր ներկա եւ պոտենցիալ հաճախորդների կարծիքը եւ այն ընդունում է ի գիտություն՝ հետագա քայլերի համար:
Դուք կհարցնեք՝ չե՞ք ասի շվեյցարական ֆրանկի փոխարժեքը: Իսկ ձեզ կպատասխանեն.
Շնորհակալություն Ձեր դիրքորոշման համար: Բանկը շատ է կարեւորում իր ներկա եւ պոտենցիալ հաճախորդների կարծիքը եւ այն ընդունում է ի գիտություն՝ հետագա քայլերի համար:
Կարդացեք նաև
Դուք կհարցնեք՝ ունե՞ք արդյոք ոսկու ձուլակտոր: Իսկ ձեզ կպատասխանեն.
Շնորհակալություն Ձեր դիրքորոշման համար: Բանկը շատ է կարեւորում իր ներկա եւ պոտենցիալ հաճախորդների կարծիքը եւ այն ընդունում է ի գիտություն՝ հետագա քայլերի համար:
Կարեւոր չէ, որ դուք ոչ մի դիրքորոշում, կարծիք էլ չեք հայտնել եւ ոչ էլ պատրաստվում եք հայտնել, միեւնույն է՝ Ամերիաբանկը շնորհակալություն է հայտնում Ձեր դիրքորոշման համար եւ շատ է կարեւորում իր ներկա եւ պոտենցիալ հաճախորդների կարծիքը եւ այն ընդունում է ի գիտություն՝ հետագա քայլերի համար: Բայց թե ձեր ո՞ր կարծիքը, ո՞ր դիրքորոշումն է Ամերիաբանկը կարեւորում եւ ի՞նչ կապ ունի ձեր կարծիքն ու դիրքորոշումը նշածս հարցերի հետ, ա՛յ, դա դուք դժվար թե երբեւէ իմանաք…
Այս եզրահանգմանը ես եկա Ամերիաբանկին ուղղված հարցիս պատասխանը ստանալուց հետո: Հայաստանյան հեռուստաալիքներից մեկով տեսա Ամերիաբանկի գովազդը: Գովազդում, բացի բանավոր խոսքից, առկա էին նաեւ հայերեն լեզվով գրառումներ, որոնցում կրկնվում էր «բանկինգ» բառը: Թեպետ «բանկինգ» բառը հայերեն բառ չէ, սակայն եթե այն գրված է հայերեն տառերով, ապա պետք է կարդացվի Բ-Ա-Ն-Կ-Ի-Ն-Գ` այնպես, ինչպես որ հնչում են այդ բառը կազմող տառերը: Սակայն այդ գովազդի բանավոր խոսքում հնչում էր ոչ թե բանկինգ, այլ բԷնկինգ` այնքան անգամ, որքան անգամ որ «բանկինգ» բառը երեւում էր էկրանին: Ամերիաբանկին ուղղված իմ այն հարցին, թե արդյոք հայերենում նոր ուղղագրական կանո՞ն է մտել, ըստ որի՝ «ա» տառը երբեմն պետք է որպես «է» կարդալ: Եթե ոչ, ապա խնդրում եմ հիմնավոր պարզաբանում, բացատրություն տալ, թե ինչո՞ւ է այդ գովազդը կարդացողը «բանկինգ»-ի «ա»-ն կարդում որպես «է»: Ահա եւ Ամերիաբանկի պատասխանը. Շնորհակալություն Ձեր դիրքորոշման համար: Բանկը շատ է կարեւորում իր ներկա եւ պոտենցիալ հաճախորդների կարծիքը եւ այն ընդունում է ի գիտություն` հետագա քայլերի համար: Հասկացա՞ք: Թե իմ ո՞ր կարծիքն էր ի գիտություն ընդունում Ամերիաբանկը, ես այդպես էլ չիմացա, մանավանդ, որ ես ոչ մի կարծիք չէի հայտնել: Այնպես որ՝ Ամերիաբանկի հետ գործ ունենալիս զգույշ եղեք: Հոգ չէ, որ չեք ստանա ձեզ հուզող հարցերի պատասխանները: Փոխարենը` ո՞վ կունենա ձեր հնարավորությունը: Ամերիաբանկը շատ կկարեւորի եւ իր հետագա քայլերի համար ի գիտություն կընդունի ձեր դեռեւս չհայտնած կարծիքն ու դիրքորոշումը: Բա պատկերացրեք՝ հայտնածի պահով ինչեր կանի:
ՏԻԳՐԱՆ ՄՈՍԻՆՅԱՆ
«Առավոտ» օրաթերթ
10.09..2015
