«Դուրս մեր գրպանից» նախաձեռնության անդամ Վարդան Հակոբյանն այսօր նույնպես միացել էր «Ոչ թալանին» նախաձեռնության անդամների կազմակերպած ավտոերթին:
Նրանից հետաքրքրվեցինք պայքարը զրոյից սկսելը, քաղաքացիներին տներից նորից դուրս բերելը ավելի դժվար չէ՞. «Ամենաբարդը պետություն կառուցելն է: Սա գործընթացներից մեկն է, ամենաբարդը, երբ մարդը հանձնվում է: Ոչ մեկ չգիտի՝ ինչ կայծից ինչ կրակ կլինի: Չէ, որ ոչ մեկ չգիտեր, չէր սպասում Բաղրամյանի դեպքերին: Այստեղ դժվարի, հեշտի խնդիր չէ: Հարցն այն է՝ խնդիրը լուծել ենք, թե չենք լուծել: Քանի դեռ լուծված չէ, չի կարելի փողոցից տուն գնալ»:
Հիշեցնենք, որ այսօրվա ավտոերթը վաղը Ազատության հրապարակում նախատեսված հանրահավաքի իրազեկման նպատակով էր: «Ոչ թալանին» նախաձեռնության անդամները վերսկսում են պայքարը՝ էլեկտրաէներգիայի սակագնի բարձրացման դեմ:
Վարդան Հակոբյանը անհնազանդության բոլոր ձեւերը նորմալ է համարում ու պնդում է, որ չպետք է հանձնվել, այլ շարունակել փողոցային պայքարը. «Կառավարությունը խաբեց, ինչպես եւ ակնկալվում էր: Երիտասարդներն էլ անփորձ էին ու մտածեցին, թե արդյունք են գրանցել: Սա էլ է նորմալ, կարեւորը ճիշտ հետեւություններ անելն է, իսկ հետեւություններն արվել են»:
Կարդացեք նաև
Պարոն Հակոբյանի խոսքով, Հայաստանում բոլոր հարցերը լուծվում են փողոցային պայքարով. «Իշխանությունը զավթածները այլ ձեւ չեն թողել, քան փողոցային անհնազանդության պայքարի մեթոդները, իշխանությունը բռնազավթածի հետ բանավեճ չեն վարում, քաղաքակիրթ ձեւով նամակ չեն ուղարկում, նրան պարտադրում են ինչ-որ բան անել»:
Մեր հարցին, այս անգամ էլ պահանջների հասցեատերը Սերժ Սարգսյանը պետք է լինի, Բաղրամյան 26-Ը, պարոն Հակոբյանը շարունակեց. «Այս պայքարը հասցեատեր չունի, միակ հասցեատերը ժողովրդի ինքնագիտակցությունն է, որ հասկանա՝ որ քո հարցի լուծումը փողոցում է: Սերժ Սարգսյանն էլ է անզոր, այս հարցի լուծողը չէ: Պետություն չունենք, պետության գլուխ չունենք, արտաքին գործերի նախարարություն էլ չունենք, միայն պաշտպանության բանակ ունենք»:
Արփինե ՍԻՄՈՆՅԱՆ
