«Ոչ սահմանադրական փոփոխություններին» ֆեյսբուքյան նախաձեռնության անդամների այսօր երեկոյան Ազատության հրապարակում հրավիրած հանրահավաքն այդպես էլ տեղի չունեցավ:
Նախաձեռնության մի քանի երիտասարդ ուշացումով հավաքվեց հրապարակում, սկսեցին նկարվել, սելֆիներ անել, հետո իրենց մի քանի համակիրներին հայտնեցին, որ հանրահավաք չէ, այլ հանրային քննարկում է լինելու:
Ձայնը տրվեց նախաձեռնության համակարգող Արա Պողոսյանին:
Կարդացեք նաև
«Շնորհակալ եմ, որ հավաքվել եք եւ ձեզ մտահոգում է Սահմանադրական փոփոխությունների այս նախագիծը, որը մեզ ներկայացվել է որպես բարեփոխումներ:
Բոլորս գիտենք՝ ինչպես են բարեփոխումներն իրականացվում, ձեւավորվում է հանրային պահանջ ներքեւից վերեւ սկզբունքով, պետք է հանրությունը որոշի՝ ինչպիսի բարեփոխումներ է ուզում: Սահմանադրություն ասելով՝ հասկանում ենք ազգային ծրագիր, որով պետք է արտահայտվի ազգի շահերն ու նպատակները: Այսօր տեսնելով այս նախագիծը, ուսումնասիրելով այն՝ եզրահանգել ենք, որ այս նախագիծը չի արտահայտում մեր ազգի իրական նպատակներն ու երազանքները:
Ինչի համար ստեղծվել է «Ոչ Սահմանադրական փոփոխություններին» քաղաքացիական նախաձեռնությունը: Նախաձեռնության նպատակն է փոփոխությունների դեմ պայքարել քաղաքակիրթ մեթոդներով, հասնել մեզ ներկայացված նախագծի՝ օրակարգից դուրս հանելուն: Լուծարել Սահմանադրական փոփոխությունների հանձնաժողովը, որը մեր դատին է հանձնել այս նախագիծը»:
Նախաձեռնության անդամներ են քաղաքագետներ Անդրիաս Ղուկասյանը, Հմայակ Հովհաննիսյանը, ԱԻՄ առաջնորդ Պարույր Հայրիկյանը, ՀԱԿ-ը, «ժառանգությունը», ԱԺ պատգամավոր Հրանտ Բագրատյանը: Նրանցից ոչ ոք այսօրվա հանրային քննարկմանը չմասնակցեցին:
Արփինե ՍԻՄՈՆՅԱՆ
