«Պարոնայք, երեւի դուք, ոմանք, համատեղ թուղթ քննարկելու փորձ չունեք»,- վրդովվեց ԱԻՄ նախագահ Պարույր Հայրիկյանը: Այսօր Հիմնադիր խորհրդարանի գրասենյակում քննարկվում էր ընդդիմադիր ուժերի`«Ազգային փրկության ճակատ» ձևավորելու մասին հայտարարության նախագիծը: Պարույր Հայրիկյանն առաջարկում էր նախագիծն ընթերցել պարբերություն առ պարբերություն եւ դիտողությունները ներկայացնել:
Հմայակ Հովհաննիսյանը, Ժիրայր Սեֆիլյանը, Անդրիաս Ղուկասյանը ցանկանում էին խմբագրական բնույթի դիտողություններն ու վերապահումները թողնել ոչ հրապարակային քննարկմանը`հրապարակային քննարկման ժամանակ տեքստը սկզբունքորեն համաձայնեցնել: Հայրիկյանն առաջարկում էր երկու նախադասություններում չորս անգամ օգտագործված «Հայաստանի հանրապետություն» դարձվածքը մեկ անգամ օգտագործել:
Հմայակ Հովհաննիսյանը բորբոքվեց. «Եթե չեք ուզում Սերժ Սարգսյանը հիշատակվի, այդպես էլ ասեք: Մենք ձեր առաջարկությունները քննարկել ենք`հրաժարական ենք պահանջում եւ վերջ»: Կրքերը հանդարտեցրեց Գարեգին Չուգասզյանը`շարունակելով տեքստի պարբերություն առ պարբերություն ընթերցումն ու քննարկումը:
«Էս երկրում Սաշիկները-Մաշիկները ունեզրկում են մարդկանց: Ես էլ թուղթ քննարկելու համատեղ փորձ ունեմ»,- ավելի ուշ կրկին վրդովվեց Հմայակ Հովհաննիսյանը`տեքստի մի հատվածի քննարկման ժամանակ. «Չորս ժամ քննարկել ենք, հիմա սյուրպրիզ ա մատուցում»:
Կարդացեք նաև
Հմայակ Հովհաննիսյանը պնդում էր, որ տեքստում անպայման նշվի, որ երկրում խախտվում է մարդկանց սեփականության իրավունքը: Ավելի ուշ, ՀՀ-ում իշխանությունը բռնազավթելու դրույթի վերաբերյալ Հմայակ Հովհաննիսյանի նյարդերը տեղի տվեցին. «Պարույր Հայրիկյանի նախաձեռնությամբ, գիշերն ինչ-որ աշխատանք է կատարվում եւ հիմա մեզ անակնկալ է մատուցվում»: «Դա իմ առաջարկությամբ չի եղել, մենք այդ հարցը շատ ենք քննարկել, ես կարծել եմ, որ դա մեր համատեղ քննարկումների արդյունքում է ավելացվել»,- հակադարձեց Պարույր Հայրիկյանը`հավելելով, որ ինքը չի մատուցում անակնկալը, «մատուցում է պարոն Չուգասզյանը»:
Վերջինս էլ ասաց, որ Հիմնադիր խորհրդարանի կողմից է ավելացվել պարբերությունը, բայց եթե դա սկզբունքային քննարկման նյութ է, կարելի է հանել, այլապես`խնդիր չկա ու երկրորդեց Հայրիկյանին, որ իշխանությունը նոր սահմանադրություն է առաջարկում, ոչ թե փոփոխություններ:
«Ես չգիտեմ`առավոտը ո՞վ ա ո՞ւմ զանգել, Բաղրամյան 26-ի՞ց են զանգել: Երեկ մենք չորս ժամ աշխատել ենք, համաձայնեցված տեքստ կա, բայց նոր բաներ են ավելացել, հակասություններ կան»,- չէր հանգստանում Հմայակ Հովհաննիսյանը: Պարույր Հայրիկյանն էլ նրան հանդարտության կոչ էր անում, քանի որ քանի որ «այսօր արդեն մի քանի դրվագով սխալ արտահայտվեցիք»:
«Ժառանգության» ներկայացուցիչը չէր մասնակցում: Aravot.am-ի հետ զրույցում Հիմնադիր խորհրդարանի ներկայացուցիչ Վարուժան Ավետիսյանն ասաց, որ իր հետ հեռախոսազրույցում Արմեն Մարտիրոսյանն ասել է` տեքստի վերաբերյալ վերջնական ձեւավորված կարծիք չունեն. թեեւ սկզբունքորեն կողմ են, բայց վարչության նիստ դեռ չեն հասցրել գումարել: Արմեն Մարտիրոսյանն էլ այսօրվա քննարկմանը չէր մասնակցում զուտ զբաղվածության պատճառով:
Նելլի ԳՐԻԳՈՐՅԱՆ
