ՀՀ ոստիկանությունից ի պատասխան հասարակական կազմակերպության հարցին` ՀՀ ոստիկանական զորքերի հրամանատար Լյովա Երանոսյանն ի՞նչ գործ ուներ Բաղրամյան պողոտայում հունիսի 23-ին` այդ օրը, երբ լրագրողների դեմ բռնություններ իրականացվեցին, պատասխանել են, թե Լյովա Երանոսյանն այնտեղ չի գտնվել:
Հարցին` ի՞նչ գնահատական կտա ոստիկանության այս պատասխանին, Խոսքի ազատության պաշտպանության կոմիտեի նախագահ Աշոտ Մելիքյանը պատասխանեց. «Կարծում եմ, որ ցինիկ պատասխանը հարցի լուծում չի կարող լինել, և եթե հասարակության ներկայացուցչին նման պատասխան է տալիս պետական որևէ ատյան, այդ դեպքում նա չպետք է ակնկալի որևէ հարգանք և վստահություն»:
Պարոն Մելիքյանը հիշեցրեց, որ Բաղրամյանում արված տեսանյութերում երևում է, որ Լյովա Երանոսյանն այնտեղ ներկա է եղել և ինչպես է իրեն պահել, ու այդ պարագայում նման պատասխան տալը ցինիզմ է:
Aravot.am-ի հարցին` ի՞նչ միտումներ է տեսնում, պետական մարմինները ցանկանում են լրագրողների դեմ բռնությունների գործը կոծկե՞լ, պարոն Մելիքյանն ասաց. «Միգուցե ՀՔԾ-ն ուսումնասիրել է իրավիճակը և հասկանում է, որ ինչքան երկար ժամանակ անցնի, այնքան կրքերը կհանդարտվեն, և տուժած լրագրողներն էլ դրա հետ կհամակերպվեն»:
Կարդացեք նաև
Այս առիթով Աշոտ Մելիքյանը հիշեց այն միջադեպը, երբ իրենց աշխատակիցը ԶԼՄ-ներից փորձել է ճշտել, թե քրեական գործն ինչ ընթացք է ստացել, լրատվամիջոցներից մեկի պատասխանատու աշխատողն ասել էր, թե գիտեք՝ արդեն ահագին ժամանակ է անցել, ինչո՞ւ է պետք այդ ամենին վերադառնալ»:
Պարոն Մելիքյանն ամփոփեց. «Ցավոք, նման տրամադրություններ էլ կան, բայց, եթե լրագրողներն իրենց իրավունքներին տեր չկանգնեն, մյուս նմանատիպ միջոցառումների ժամանակ էլ ավելի ցինիկաբար կխոչընդոտվի լրագրողական գործունեությունը»:
Տաթև ՀԱՐՈՒԹՅՈՒՆՅԱՆ
