Մշակույթի նախարարությունը ճարտարապետներին խոստացել է աշնանը պատասխանել «Զվարթնոց» օդանավակայանի աշտարակը հուշարձա՞ն է եւ այն կընդգրկվի՞ հուշարձանների պահպանության ցանկում, թե ոչ: Սակայն մինչ այդ, չի բացառվում, որ օդանավակայանի կոնցեսիոներն այն քանդի: Այսօր «Անալիտիկ» մամուլի ակումբում այս մասին ասաց ճարտարապետ Սաշուր Քալաշյանը:
Երբ աշտարակի քանդման հարցը բարձրացվել է, ճարտարապետներով հավաքվել եւ հանրապետության նախագահին, օդանավակայանի կառավարիչ Էդուարդո Էռնեկյանին նամակ են գրել, որից հետո կոնցեսիոները ընդառաջելով, որոշել է միայն աշտարակը պահպանել, սակայն օղակաձեւ հատվածը` քանդել: Ըստ Սաշուր Քալաշյանի, այդ ամբողջը մեկ համալիր է եւ միասին դիտարկվում է որպես հուշարձան. «Այն իրենից պատմամշակութային արժեք է ներկայացնում, եւ եթե այդ կառույցին մոտենայինք պետականորեն, գտնեինք, որ դա արժեք է ներկայացնում պետք է ամեն գնով գտնեինք դրա օգտագործման ձեւը»:
Կառավարիչը 2,5 միլիոն դոլար է վճարելու կառավարությանը, որպեսզի կազմակերպի աշտարակի քանդման աշխատանքները: Երբ ճարտարապետները կոնցեսիոներից հետաքրքրվել են, թե ինչո՞ւ աշտարակը չի վերականգնում եւ այդ տարածքում բիզնես գործունեություն իրականացնում, կառավարիչը վստահեցրել է, որ շենքը վթարային է եւ այն վերանորոգելու դեպքում կպահանջվի 10-15 միլիոն դոլար եւ որ բիզնես տեսանկյունից ավելի ձեռնտու է քանդելը, քան վերանորոգելը:
Ճարտարապետի կարծիքով, աշտարակի պահպանումը կառավարության խնդիրն է, քանի որ այն վարձակալությամբ է հանձնված կոնցեսիոներին, սակայն, եթե նա չի կարողանում տակից դուրս գալ, ապա պետք է աշտարակի հատվածը նվիրատվություն անել օդանավակայանի կառավարիչին` պայմանով, որ այն չի քանդելու:
Կարդացեք նաև
Հարցին, թե ի՞նչ է կառուցվելու քանդված աշտարակի տեղում, կառավարիչը ճարտարապետներին պատասխանել է` այգի:
«Մենք պնդում ենք, որ այն ոչ մի դեպքում քանդել չի կարելի: Ժամանակին այդ աշտարակն ընդգրկված է եղել հուշարձանների ցանկում, բայց անհայտ պատճառներով դուրս է մնացել: Հիմի էլ հարցն օդի մեջ է»,-փաստում է Սաշուր Քալաշյանը:
Լուսինե ԲՈՒԴԱՂՅԱՆ
