«Եթե գոյություն ունի «Ոչ»-ի երկու ճակատ, դա նշանակում է, որ «Ոչ» իրականում գոյություն չունի»,- այսօր «Պոստ սկրիպտում» մամուլի ակումբում, պատասխանելով Aravot.am-ի հարցին, ասաց ՀՀԿ խմբակցության քարտուղար Գագիկ Մելիքյանը: Իշխող կուսակցության ներկայացուցչից հետաքրքրվել էինք`սահմանադրական բարեփոխումների «Ոչ»-ի ո՞ր ճակատն է ՀՀԿ-ի համար առավել սարսափելի`առաջին նախագահի գլխավորությամբ ՀԱ՞Կ-ը, թե՞Ժիրայր Սեֆիլյան- Րաֆֆի Հովհաննիսյան ալյանսը:
«Սարսափելի ճակատ գոյություն չունի»,- վստահեցրեց Գագիկ Մելիքյանը`հավելելով, որ «Ոչ»-ի գործընթացն ազդեցություն չի կարող ունենալ: Նա կարծում է, որ կարելի է սահմանադրական բարեփոխումների շուրջ արդեն իսկ ձեւավորված համարել կոնսոլիդացված դաշտը, որը հասարակության մեջ հիմնավորում է նաեւ դրանց անհրաժեշտությունը: Դրա ապացույցը, իշխող կուսակցության ներկայացուցիչը համարում է նախագահի մոտ դեռ շարունակվող քաղաքական ուժերի հետ հանդիպում-քննարկումները, հասարակական շրջանակներում ընթացքող ակտիվ քննարկումները:
«Ոչ»-ի ճակատի ոչ միասնականությունն, ըստ ՀՀԿ-ական պատգամավորի, արդեն իսկ խոսում է այն մասին, որ նրանք դատապարտված են, մանավանդ, որ այդ ճակատում, իր գնահատմամբ` ոչ քաղաքական, ոչ բովանդակային քննարկումներ չեն լինում: «Ոչ»-ի ճակատը բացի ոչ-ից ասելու ոչինչ չունի»,- ասաց նա:
Նելլի ԳՐԻԳՈՐՅԱՆ
