Ինչո՞ւ են աշխատանքից ազատել Էդգար Ամիրյանին
Իջեւանի քաղաքապետի թեկնածուներ Վարդան Ղալումյանը եւ Վարուժան Ներսիսյանը շարունակում են հանդիպումներ ունենալ Իջեւանի հիմնարկ-ձեռնարկություններում: Սեպտեմբերի 7-ին նախկին քաղաքապետ Վ. Ներսիսյանը հանդիպում է ունեցել Իջեւանի երաժշտական դպրոցում: Նա դպրոցի կոլեկտիվին հիշեցրել է, որ իր պաշտոնավարման շրջանում՝ 2010թ., Հայաստանի սոցիալական ներդրումների հիմնադրամի կողմից նորոգվել, վերակառուցվել է երաժշտական դպրոցը, լավ պայմաններ են ստեղծվել: Նա խոստացել է ընտրվելու դեպքում բարձրացնել երաժշտական դպրոցի աշխատողների աշխատավարձերը:
Ինչպես մեզ հայտնեց Իջեւանի երաժշտական դպրոցի ուսմասվար Գոհար Բարսեղյանը, դաշնամուրի դասատու Արմինե Մելիքբեկյանը նախկին քաղաքապետին հարց տալով՝ խոսել է ցուրտ, չջեռուցվող դասասենյակների մասին, ասելով, որ ջեռուցվում էր միայն դպրոցի նախկին տնօրեն Սվետլանա Բեգլարյանի աշխատասենյակը. « Ամբողջ տարին չջեռուցեցին, բարձրանում էինք տնօրենի կաբինետ, տեսնում էինք պլիտան միացրած՝ իր շրջապատով տաքանում էին, մեզ էլ ասում էին՝ էս ա մեր պայմանները, չեք ուզում, դուրս եկեք»:
Ա. Մելիքբեկյանն ասել է, որ այդ պատճառով դասերը 20-25 րոպե էին տեւում: Նա հայտնել է, որ նախկին տնօրենի օրոք երաժշտական դպրոցի որոշ դասատուներ 90-100 հազար դրամ աշխատավարձ էին ստանում, իսկ բարեխիղճ աշխատող դասատուները՝ 30-40 հազար դրամ: Նա հայտնել է, որ նախկին տնօրեն Ս. Բեգլարյանից երկյուղելով ՝ իրենք չեն համարձակվել իրենց խնդիրները ներկայացնել Վ. Ներսիսյանին:
Կարդացեք նաև
Ա. Մելքիբեկյանի խոսքերով՝ ինքը փորձել է դպրոցի խնդիրները քաղաքապետին ներկայացնել Իջեւանի ավագանու նախկին անդամ Նարինե Գրիգորյանի միջոցով, սակայն հաջողության չի հասել: Վարուժան Ներսիսյանն ասել է, որ հնարավոր է երաժշտական դպրոցի շենքի վերակառուցման նախագծում եւ շինարարության ընթացքում թերություններ լինեին: Նա Ա. Մելիքբեկյանին ասել է, որ դպրոցի խնդիրները կարող էր ներկայացնել երաժշտական դպրոցում իր հանդիպումների ընթացքում:
Հանդիպմանը ներկա լրագրողներից մեկը հարց տալով ՝ասել է, որ դպրոցի շվիի դասատու Էդգար Ամիրյանին աշխատանքից ազատել են այն պատճառով, որ նա գաղափարապես հարել է Վարուժան Ներսիսյանին: Դպրոցի ուսմավար Գոհար Բարսեղյանն ասել է, որ Էդգար Ամիրյանը դպրոցում աշխատանքի էր ընդունվել կեղծ վկայականով, բացի այդ, նա երկու նկատողություն էր ստացել:
Ոսկան ՍԱՐԳՍՅԱՆ
