Վաշինգտոն – 1991 թվականի սեպտեմբերի 2-ին Լեռնային Ղարաբաղի ինքնավար մարզի և հարակից Շահումյանի շրջանի օրենսդիր մարմինը հայտարարեց Լեռնային Ղարաբաղի Հանրապետության (ԼՂՀ)՝ Արցախի կազմավորման մասին: 24 տարի առաջ օրինական բանաձևը չեղյալ հայտարարեց Իոսիֆ Ստալինի 1921 թվականի կամայական որոշումը՝ հին հայկական Արցախի նահանգն այն ժամանակվա նորաստեղծ Խորհրդային Ադրբեջանի կազմի մեջ մտցնելու մասին:
«Մենք միանում ենք բոլոր բարի կամքի տեր մարդկանց՝ տոնելու Արցախի անկախության օրը», – հայտարարեցին Ամերիկայի Հայկական Համագումարի խորհրդի համանախագահներ Էնթոնի Բարսամյանը և Վան Գրիգորյանը. «Մենք ողջունում ենք Լեռնային Ղարաբաղի նվիրվածությունը ժողովրդավարությանը և անկախությունից ի վեր նրա շարունակական վճռականությունն անմեղ քաղաքացիների հանդեպ Ադրբեջանի ագրեսիայի արմատացած դրսևորման դեմ: Խորհրդային Միության փլուզման պահին Միացյալ Նահանգները հաստատակամորեն պայքարում էր հանուն Լեռնային Ղարաբաղի ճնշված հայերի իրավունքների պաշտպանության. սա մեզ համար հարմար առիթ է շնորհակալություն հայտնելու այն պաշտոնյաներին, ովքեր Ամերիկան ներկայացնում են լավագույն կողմից և բացահայտելու նրանց, ովքեր կաշառված են ադրբեջանական նավթադոլարներով Լեռնային Ղարաբաղի Հանրապետության խիզախ քաղաքացիներին բնաջնջելու համար», ասացին Բարսամյանը և Գրիգորյանը:
1991 թվականին անկախություն ձեռք բերելուց ի վեր ԼՂՀ-ն իր անկախությունը պաշտպանել է ռազմի դաշտում և զարգացել է որպես կայուն ժողովրդավարություն` կենսունակ քաղաքացիական հասարակությամբ և զարգացող շուկայական տնտեսությամբ: Չնայած Ադրբեջանի նորացված ագրեսիայի շարունակվող սպառնալիքներին՝ Արցախը շարունակում է հավատարիմ մնալ մարդու իրավունքների և քաղաքացիական ազատությունների համամարդկային արժեքներին: Հանրապետության քաղաքացիները և իշխանությունները հաստատակամ են շարունակելու զարգանալ որպես ինքնիշխան ժողովրդավարություն և միջազգային հանրության վստահելի անդամ:
ԼՂՀ անկախության 24-րդ տարելիցի կապակցությամբ ԱՄՆ կոնգրեսականներ և Կոնգրեսի հայկական հանձնախմբի համանախագահներ Ֆրենկ Փալլոն կրտսերը (դեմոկրատ, Նյու Ջերսի նահանգ) և Ռոբերտ Ջ. Դոլդը (հանրապետական, Իլինոյս նահանգ) շնորհավորական նամակ են գրել նախագահ Բակո Սահակյանին և Արցախի ժողովրդին: Համանախագահները նշել են, որ «1991 թվականին [Արցախի] հանրապետության ձևավորումը ճանապարհ բացեց դեպի անկախություն և ժողովրդավարություն, և ձեր ժողովուրդը շարունակում է ցույց տալ իր նվիրվածությունն այս համամարդկային արժեքներին»: Նամակում կոնգրեսականներ Փալլոնը և Դոլդը նաև աջակցություն են հայտնում Արցախի՝ « միջազգային ճանաչմանն ուղղված ջանքերին և լիահույս են առ այն օրը, երբ վերջինս իր արժանի տեղը կստանձնի ազգերի համայնքում»:
Կարդացեք նաև
ԱՄՆ-ում ԼՂՀ ներկայացուցիչ Ռոբերտ Ավետիսյանը շնորհակալություն է հայտնել կոնգրեսականներ Փալլոնին և Դոլդին հայ համայնքի համար կարևոր հարցերում նրանց շարունակական առաջնորդության և Արցախի ինքնիշխանության և ժողովրդավարական ձգտումներին ուղղված նրանց մշտական աջակցության համար:
Ամերիկայի հայկական համագումարի մամլո հաղորդագրություն
