Այսօր՝ սեպտեմբերի 8-ին, ԱԺ առողջապահության մայրության եւ մանկության հարցերի հանձնաժողովում ՀՀԿ պատգամավոր Մանվել Բադեյանը վիճեց կառավարության ներկայացուցչի՝ առողջապահության փոխնախարար Սերգեյ Խաչատրյանի հետ: Բարեբախտաբար, վիճաբանությունը լավ ավարտ ունեցավ եւ իրար հասկացան:
Հանձնաժողովում քննարկվում էր կառավարության նախագիծը՝ «Դեղերի մասին» եւ մի շարք այլ օրենքներում փոփոխություններ կատարելու մասին:
Առողջապահության փոխնախարար Սերգեյ Խաչատրյանը նշեց, որ դեղերի գները պետք է կարգավորի պետությունը:
Մանվել Բադեյանը զարմացավ՝ գների կարգավորման իմաստն եմ ուզում հասկանամ, ինչի՞ պետք է կարգավորվի:
Կարդացեք նաև
Սերգեյ Խաչատրյանը պատասխանեց, որ մեր շուկան փոքր է, մոնոպոլիզացիայի ենթարկվող. «Մենք չենք ասում, որ բոլոր դեղերի գները պետք է կարգավորվեն՝ կառավարության կողմից հաստատված դեղերի ցանկ կա՝ այն դեղերը, որոնք ձեռք են բերվում պետության կողմից, փոխհատուցման ենթակա են լրիվ կամ մասնակի, դրանք թվով 45-ն են: Մենք միջին գին ենք վերցնում, ֆիքսում ենք»:
Մանվել Բադեյանը հարցրեց. «Գների աճի դեմ միակ գործուն մեխանիզմը մրցակցությունն է, ոչ թե պետական կարգավորումը: Պետական կարգավորումը պետք է, երբ մենաշնորհ է առաջանում: Պետությունն ի զորու չէ՞ պայքարել մենաշնորհի դեմ, ոչ թե գների դեմ: Երբ պետությունը մենաշնորհը վերացնում է, ազատ շուկան ինքնին կարգավորում է բարձր գները»:
Հանձնաժողովի նախագահ Արա Բաբլոյանը բացատրեց՝ արտադրողը հզոր կազմակերպություն է, չի էլ ճանաչում մեր երկրում ով է ներկայացուցիչ, գալիս է մեկը, ասում է՝ ունեմ այս ներուժը, որով կարողանում եմ արտադրողից ամբողջ ինֆորմացիան վերցնեմ ու դառնամ քո երկրում ամբողջ պատասխանատուն որակի, այդ պարագայում դառնում է նա մենաշնորհատեր»:
Դեղգործակալության տնօրենն էլ ասաց, որ դեղերի շուկայում մենաշնորհացման դեմ պայքարում են՝ թույլ տալով, որ դեղեր ներկրեն 3 լեզուներով, որը եվրոպական դեղերի արտոնություն է տալիս, հատուկ փաթեթավորման կարիք չի լինում: Ներդիրում պետք է լինի հայերեն՝ ազգաբնակչության համար: Այդպես մենաշնորհը քանդվում է, մենք բացում ենք շուկան:
«Բա որ մենաշնորհը քանդվում է, էլ ինչի՞ եք գին սահմանում,- զարմացավ Բադեյանը. «Ախր դու ո՞վ ես, որ գին սահմանես: Պետությունն ի՞նչ կապ ունի գին սահմանելու հետ: Պետությունը գին է սահմանում, օրինակ, բաշխիչ ցանցերի, գազի համար, որովհետեւ մենաշնորհ է: Այդ դեպքում միայն պետությունը պիտի խառնվի: Ի՞նչն է խանգարում գրանցված դեղը, որն ունի հազար հատ արտադրող, ուրիշն էլ թող ուրիշ սինոնիմ բերի»:
Սերգեյ Խաչատրյանը պատասխանեց. «Մեր երկիր դեղ ներկրողներն ունեն իրար հետ պայմանավորվելու հնարավորություն եւ կարող են բարձր գներով վաճառել»:
Բադեյանը նյարդայնացավ եւ հիշեցրեց, որ դրա համար մենք ունենք Տնտեսական մրցակցության պաշտպանության հանձնաժողով՝ հակամենաշնորհային ֆունկցիայով. «Բա ինչի՞ կոշիկի գինն էլ չեք ուզում կարգավորել, որ»:
Բադեյանին բարկացրեց, երբ փոխնախարարը պատասխանեց՝ սոցիալիզմը լավ բան է:
«Մենք սոցիալիզմի չենք ուզում գալ: Ձեր ուզածի դերն ու նշանակությունը չինովնիկության բարձրացումն է, ուրիշ բան չէ»,- պատասխանեց Բադեյանը: Փոխնախարարն էլ հակադարձեց, թե կոշիկն ու դեղը նույնը չի. «Մի կոշիկը կարաս 10 տարի հագնես, բայց դեղը պիտի ամեն օր առնես»:
Բանավեճին միջամտեց Արա Բաբլոյանը՝ Մանվել Բադեյանին ասելով, որ չես խորանում, բորբոքվում ես. «ՀՀ-ում իրականացվում է փոխհատուցվող դեղերի գների պետական կարգավորում: Փոխհատուցվողը նա է, երբ պետությունն ինքն է դեղերն առնում, տալիս բնակչին: Օրինակ, երբ մանկատուն ունես, մանկատան համար դեղերի գները կարգավորում ես»:
«Այ դա ուրիշ բան է, դա ճիշտ է, թե չէ ինչի՞ եք ասում սոցիալիզմ եք սարքում»,- բարիշեց Մանվել Բադեյանը:
Ի վերջո` հանձնաժողովը դրական եզրակացությամբ «Դեղերի մասին» օրենքում նախատեսված փոփոխությունների փաթեթն ընդգրկեց ԱԺ նիստերի օրակարգ»:
Հռիփսիմե ՋԵԲԵՋՅԱՆ
